Рәшит Ваһапов фестивале яңа йолдызлар кабызды

Быел 34 артист һәм дүрт коллектив номинант буларак игълан ителде. Ә фестивальнең Гран-приена яшь җырчы, Казан дәүләт мәдәният һәм сәнгать институты студенты, тамашачы каршында инде үзенең сольный концерты белән имтихан тоткан Ранис Габбазов лаек булды. Яңа тавышлар, вертуоз музыкантлар, тамашаның мөхтәрәм кунаклары - бу көнне тамашачыларга әнә шуларны күрергә насыйп булды.

Гала концертның иң җылы, матур мизгеле милләтебезнең легендар җырчысы, Татарстанның халык артисты Флёра Сөләйманованың сәхнәгә чыгуы булды.

- Мин Ваһапов чоры җырчыларыннан ялгызым гына калып барам кебек. Рәшит абый халык арасында искиткеч популяр кеше булды. Пластинкалар заманы иде - халык аларны бик нык алды. Рәшит абыйның үлем хәбәрен гастрольләрдә вакытта ишеттем. Ул чакта Усман Әлмиев төркемендә эшли идем, - диде Флёра Сөләйманова.

Алып баручылар соравы буенча ул «Әниемә» һәм «Алтын көмеш» халык җырларын башкаргач, залдагы тамашачылар бөек җырчыбызны аягурә басып алкышлады.

Гала-концертта Флёра Сөләймановадан тыш тагын башка легендар җырчылар - фестиваль конкурсының жюри рәисе Ренат Ибраһимов, Россиянең атказанган, Татарстанның халык артисты Венера Ганиева, Татарстанның һәм Башкортстанның атказанган артисты Илһам Вәлиев чыгыш ясады. Шулай ук фестивальнең алдагы еллардагы лауреатлары Азат Абитов, Гөлсирин Абдуллина, Артур Исламов чыгышларын да тамашачы бик җылы кабул итте.

Зөлфирә Шәйдуллина, Артур Салихов, Марат Яруллин, Илгиз Мөхетдинов кебек яшь егет-кызлар янәшәсендә татар тамашачысына таныш исемнәр дә шактый иде. Мәсәлән, фестивальнең иң яшь катнашучысы, Беренче каналдагы «Голос» проекты финалисты, Казанның 16 нчы татар-рус гимназиясендә укучы Сәйдә Мөхәммәтҗанова, яшь җырчы Айсылу Габдинова һәм Башкорстанда яшәп иҗат итүче артист Лилиана Ирназарова, "Үзгәреш җиле" проектында катнашкан Илнар Миранов - әнә шундыйлардан.

Фестивальне оештыручыларны һәм җырчыларны Дәүләт Советы рәисе урынбасары Римма Ратникова сәламләде.
2004 елда Кәрим Тинчурин исемендәге театрда беренче фестиваль ачылган иде. Ул вакытларда аның киләчәгенә кагылышлы төрле сораулар да булды. Әмма унөч ел узып та киткән. Шушы вакыт эчендә фестиваль күпме юллар, илләр, төбәкләр узып, никадәр талантлар ачылып, күпме җырчылар үстереп, эстрадага ишекләр ачып, зур эшләр эшләде, - диде ул һәм оештыручыларга рәхмәтен җиткерде.

Римма Ратникова Татарстан җитәкчеләренең Рәшит Ваһапов исемендәге фестивальгә рухи һәм матди яктан ярдәм күрсәтүләре турында да әйтеп узды һәм Дәүләт Советы рәисе Фәрит Мөхәммәтшинның сәламнәрен җиткерде.