Шәҗәрә төзү эшен нидән башларга?

2027 елга интернет-портал эшләтеп җибәрү планлаштырыла, биредә теләгән һәркем ясалма интеллект ярдәмендә үзенең шәҗәрәсен төзи алачак. Бу хакта Татарстан Республикасының Архив эше буенча дәүләт комитеты рәисе хәбәр итте.

— "Бездә" Ядкарь" проекты эшли. Без айти-компанияләрнең берсе белән платформа төзедек, биредә метрик китаплар, шулай ук халык санын алу мәгълүматлары кертелә. Аннан соң ясалма интеллект шәҗәрә ясарга булыша. Әлегә без авыллар буенча эш алып барабыз. Вакыт узу белән дәүләт хезмәтләре порталы аша бу системага бөтенләй бушлай керү мөмкинлеген ачачакбыз. Бу 2027 елда эшләп бетерергә планлаштырыла, - дип сөйләде спикер.

Гөлнара Габдрахманова сөйләвенчә, проект 93 авылны үз эченә алган, хәзер тагын дүрт авылда эш бара. Шул ук вакытта 150 йортлы торак өчен нәсел шәҗәрәләрен төзүгә дүрт атна вакыт китә.