Шәхси хуҗалыкларда сыер асраучыларга ярдәм кирәк

"Районнарга эш буенча баргач, авыл халкы савым терлекләрен субсидияләү мәсьәләсен кат-кат күтәрде. Марат Готыфович, Сезгә республиканың Икътисад министрлыгы белән берлектә субсидияләүнең формасын эшләргә, былтыр ничек булганын искә төшерергә һәм эш буенча системасын тәкъдим итәргә кирәк булыр. Шәхси утарларда савым терлегенең баш санын саклау өчен бу мөһим эш дип саныйм. Республиканың мөмкинлеген бәяләп, мәсьәләнең чишелешен табарга кирәк", - дип, республиканың Авыл хуҗалыгы һәм азык-төлек министрлыгы белән Икътисад министрлыгына йөкләмә бирде Президент. Һәм инде дүшәмбедә тәкъдимнәр көтәчәген әйтте.