Спиртлы эчемлекләр сатуның вакыт чиген бозучылар җаваплылыкка тартыла

Татарстанда кибетләрдә кичке 10нан иртәнге 10.00 сәгатькә кадәр спиртлы эчемлекләр сату тыела. Закон таләбен үтәмәүнең Зәйдә - 4, Түбән Камада - 11 һәм Мөслим, Сарман, Чирмешән районнарында берәр очрагы теркәлгән. Авыл кибетчеләренең аклану җаваплары бик охшаш.

Башта: «Сез нәрсә? Аракы сатмадым», - дип күзгә карап, инкарь итәләр ди. Дәлилләгәч, гаепләрен танып: «Сәгатькә карарга онытканмын», «Арыган идем шул» яки «Игътибар бирмәгәнмен», - дип акланырга тырышалар икән.
Түбән Кама кибетләре сатучыларының дәүләт алкоголь инспекциясе хезмәткәрләре алдында керфекләре дә селкенмәгән. «Акча эшләп алырга исәпләдек. Хезмәт хакларыбыз товар сатудан кергән керемнәргә бәйле», - диләр икән.

Канунны бозган кибетчеләрнең һәркайсына административ беркетмә тутырылган. Саллы гына штраф түләгәч, икенче юлы аракы сатканда, күзеңне сәгатьтән алмассың, валлаһи.