#Кыскача яңалыклар 16 август 2023, 16:04

Талантлы балалар Мәскәү һәм Санкт-Петербург вузларын сайлый

16 август 2023, 16:04

Талантлы балаларны республикада калдыру өчен кулдан килгәнне эшләргә кирәк. Аларга үзебездә югары белем алу, эшкә урнашу, карьера төзү өстенлеген күрсәтергә кирәк, дип белдерде Татарстан Мәгариф һәм фән министры Илсур Һадиуллин Бәшир Рәмиев исемендәге IT паркта узган республика мәгариф хезмәткәрләренең август киңәшмәсендә.

Скопировать ссылку

Узган елда бердәм дәүләт имтиханында 200 балл алган 14 укучының 6сы гына Татарстан вузларында белем ала. Быел да, беренчел мәгълүматлар буенча, ике предметтан иң югары баллны җыйган 9 укучының 7се Мәскәү һәм Санкт-Петербург вузларында укырга ниятли.

Илсур Һадиуллин талантлы абитуриентларны җәлеп итүдә Казан федераль университеты тәҗрибәсен уңай бәяләде. Уку йорты халыкара һәм бөтенроссия олимпиадаларында җиңү яулаган беренче курс студетларына 300 мең сум түләргә карар кылган. Иң югары балл җыючыларга да акчалата премияләр биреләчәк.

Гүзәл Насыйбуллина

Кызыклы яңалыкларны күзәтеп бару өчен Т елеграмга кушылыгыз.