#Кыскача яңалыклар 25 декабря 2016, 06:01

Татарны моң җыя

25 декабря 2016, 06:01

Казан шәһәренең Яңа Савин районында урнашкан 29нчы китапханәсендә үзенчәлекле моң бәйрәме узды. Татар халкының мәшһүр композиторы Салих Сәйдәшевкә багышланган бу кичәне китапханә каршында эшләп килгән «Таныш моңнар» клубы оештырды. Мондый кичәгә моң сөючеләр инде дүртенче ел җыела.

Скопировать ссылку

Казанның 17нче музыка мәктәбе укучылары бәйрәмнең көтеп алынган кунаклары булды. Алар Салих Сәйдәшев әсәрләрен курайда, скрипкада, флейтада һәм баянда башкардылар, җырларын яңгыраттылар.

Композиторның тормыш һәм иҗат юлы турында галим, шагыйрь Хәнәфи Бәдигый кызыклы итеп сөйләде. «Таныш моңнар» клубы әгъзалары да Салих Сәйдәшев җырларын башкардылар.

Татар ничек моңлы булмасын?! Шагыйрә Нәҗибә Сафина үзенең бу кичәдә ясаган чыгышын шулай дип башлаган иде. Шагыйрә мәшһүр композитор Салих Сәйдәшевнең татарның рухи дөньясында тоткан урыны хакында уйлана һәм тыңлаучыларны да бу хакта уйландырды. «Моң татарны җыю, берләштерү көченә ия, ә бүген исә безгә, бик күп эшләребезне тормышка ашыру өчен, нәкъ шул бердәмлек җитенкерәми», - диде ул.

Китапханә яңа елдан яңа иҗади көчләрне үзенә чакыра. Биредә гыйнвар аеннан әдәбият түгәрәкләре эшли башлаячак. Түгәрәктә балалар үзләре язган драма әсәрләрен үзләре куячаклар. Аларның пьесалары бүгеннән үк кабул ителә.