Татарстанда ике метрлы җәенне тотарга рөхсәт ителә, ә чөгәне тоту тыела

- Республикада "Уылдык" операциясе һәр язда игълан ителә. Балыкларның уылдык чәчү чорында елгаларга моторлы көймәләрдә керү, сәнәгать күләмнәрендә балык тоту катгый тыела. Һәвәскәр балыкчыларга, балыкларның уылдык чәчү чорында да, ярдан кармак белән балык тоту рөхсәт, ләкин, кармак җебендә энәләр ике берәмлектән артырга тиеш түгел,-диде "Татар-нформ" агентлыгында узган матбугат конференциясендә республиканың Тереклек дөньясы объектларын саклау һәм файдалану буенча идарәсенең бүлек җитәкчесе Радик Мутахаров.

Балыкларның уылдык чәчү чорында көймәдә берничә кармак яки ятмә белән балык тоткан кешеләргә 2 мең сумнан 5 мең сумга кадәр штраф салына. Әгәр ятмә белән берничә центнер балык тотсаң, 300 мең сумнан 500 мең сумга кадәр штраф һәм, хәтта, ике елга кадәр иректән мәхрүм калү яный.

Быелгы язда 1632 административ штраф беркетмәсе тутырылган, 62 җинаять эше кузгатылган, 3028 берәмлек ятмә конфискацияләнгән. Бу ятмәләрнең гомүм озынлыгы 400 километр, Казаннан Түбән Новгородка кадәр сузарлык.

Җәйге чорда көймәләрдә Идел, Чулман, Нократ елгаларының уртасына кадәр кереп, кармак белән балык тотарга рөхсәт. Һәвәскәр балыкчыларга ятмә белән балык тоту, гомүмән, тыела. Шулай ук суднолар йөреше юлына туктарга ярамый.

- Әгәр, бәхет елмаеп, кемдер кармак белән ике метрлы җәен (сом) балыгы тота икән, бу - аныкы. Чөгә (стерлядь) балыгын тоту тыела,-дип, искәртте Радик Мутахаров. - Кармакка эләккән балык балаларын да кире суга җибәрергә кирәк. Мәсәлән, җәен балыгы баласы эләгә икән, кире суга җибәрик, үссен.