Татарстанда танылган эшмәкәр хәрби операциягә китә

Чаллыдагы "Приют человека" проекты җитәкчесе Рөстәм Гатин шушы көннәрдә махсус хәрби операция зонасына китәргә җыена. Аның әлеге теләген шәһәр җитәкчелеге хуплап каршы алды. Хәтта юлга чыгар алдыннан күп кенә оешма җитәкчеләре, эшмәкәрләр ярдәм күрсәтергә теләде.

Алар арасында "Далини" компаниясе җитәкчесе Руслан Нигматулин да бар. Ул шәһәребездән мобилизацияләнүчеләр өчен кирәк-яраклар тутырылган махсус капчыклар тапшырган иде. Шундый капчыклар Рөстәм Гатин командасына да бирделәр. Кирәк булса, транспорт белән дә ярдәм итәчәкбез, дип сүз куешты эшмәкәрләр, дип хәбәр итә "Шәһри Чаллы".