Татарстанда тугыз айда 211 кеше үтергәннәр

- Милли нәфрәт аркасында җинаятьләр кылган төркем тотылды. Әлеге төркемнән икесе Чад егетен үтергән булып чыкты. Җинаятьне тикшерү тәмамланды, шушы көннәрдә эш суд хөкеменә тапшырылачак, - дип хәбәр итте Татарстан буенча Эчке эшләр министрлыгының җинаятьләрне эзләү идарәсе җитәкчесе урынбасары Тимур Шакирҗанов.

Республикада тугыз айда 211 үтерү очрагы теркәлгән, кеше җанын кыйган 204 очрак ачыкланган, ягъни җинаятьчеләр тотылган. Үтерүләрнең күпчелеге «көнкүреш» төренә карый.

Эчүчелек, наркоманлык, фахишәлек һәм хәтта чарасызлык та еш кына җинаятьчегә яки җинаять корбанына әверелдерә.

Казанда 27 февральдә Габишев урамында чүп-чар контейнерында ир-ат җенесендәге яңа туган сабыйның үле гәүдәсе табылды. Экспертиза ачыклаганча, дөньяга тере килеш туган сабый, тууга ук, әйбер каплап үтерелгән. Шушы җинаятьне эшләгән Үзбәкстан хатыны март аенда тотылган. Бу коточкыч адымга баруын ул Казанда теркәлмәгәнлеге, яшәү чыганагы булмавы һәм акчасы беткәнлеге белән аңлатырга тырышкан.

Зәй шәһәрендә 22 яшьлек бер хатын-кыз юньләп таныш булмаган ир белән табигать кочагына кәеф-сафа корырга чыккан. Быелның 4 маенда Зәй ГРЭСы плотинасыннан аның, полиэтиленга урап, суга батырылган мәетен табып алганнар. Чаллы шәһәрендә яшәгән 30 яшьлек ир шушы җинаятьне эшләгәнен таныган.

Яшел Үзән районының Кече Ключи авылында 13 майда 52 яшьлек ир «җир йоткандай» юкка чыккач, туганнары, борчылып, полициягә мөрәҗәгать иткән. Тикшерү барышында урман буеннан әлеге ирнең үтерелгән һәм ярым яндырылган гәүдәсе казып алынган. Ирнең җир кишәрлекләрен тартып алу максатында, шушы җинаятьне, иптәшләре белән берлектә, 2000 елда туган үз малае эшләгән.

Кырын эш кырык елдан соң да билгеле була, дигән гыйбарәгә дә дәлилләр җитәрлек. Полиция хезмәткәрләре элекке елларда эшләнелгән 21 үтерү очрагының эзенә төшкән. Мәсәлән, 1988 елда Алабугада бер эшкуар кыз һәм «Вилориковские» җинаятьчел төркеме егете үтерелгән булган. Әлеге җинаятьчел төркем әйдаманы эшкуар кызга тиешле 100 мең сум бурычын кайтарырга теләмәгән. кызны эшкуар үтерттергән, җинаять­кә юл-транспорт һәлакәте рәвеше бирергә омтылганнар. Җинаятьне гамәлгә ашырган җинаятьчел төркем егетен, «серне чишмәсен» дип, үзен дә үтергәннәр. Бу җинаять эше, гаеплеләргә хөкем карары чыгару өчен, Татарстанның Югары судына тапшырылган.

- Татарстанда авыр җинаятьләр кылу очраклары елдан-ел кимүгә бара, кеше үтерүчеләр фаш ителә. Бу - җинаятьләрне эзләү хезмәте хезмәткәрләренең дә тырышлыгы нәтиҗәсе, - диде Тимур Шакирҗанов.

Белеп тор

Җинаятьче һөҗүменә дучар булсагыз яки ­җинаять фактын күрсәгез, кичек­мәс­тән, полициягә хәбәр бирегез. Кә­рәзле телефоннан: 02, 102, 112 һәм гадәти телефоннан 8 (843) 291-20-02 шалтыратыр­га мөмкин.