Казанда «Ел волонтеры» премиясен тапшырдылар. Биредә ел әйләнәсе актив булган волонтерларны билгеләп китәләр, бер еллык эшчәнлеккә нәтиҗә ясыйлар. Әлеге чарада 500гә якын республика волонтерлык оешмасы катнашты.
Татарстан премьер-министр урынбасары Ләйлә Фазлыева 2018 елның Россиядә Волонтерлар елы булуын искәртеп китте.
– Волонтерлар елының уңышлы тәмамлануы белән котлыйм сезне. Яхшылык ул – ирек дигән сүз. Яхшы кеше һәрвакыт ирекле, чөнки аның җаны тыныч, ул дөньяга яктылык китерә. Сез дә бу дөньяга яхшылык китерәсез, мин сезгә шуның өчен бик рәхмәтле, – диде Ләйлә Фазлыева.
Татарстанның яшьләр эшләре министры Дамир Фәттахов та волонтерларга башкарган эшләре өчен рәхмәт сүзләре җиткерде.
– Волонтерлык – һөнәр түгел, ул күңел кушуы буенча башкарыла торган эш. Мин бүген Татарстан Президенты Рөстәм Миңнеханов белән очраштым. Президент республикада волонтерлар өчен ресурс үзәк булдырылачак диде, – ди Дамир Фәттахов.
Чара ахырында ел әйләнәсендә Татарстанга төрле чаралар үткәрергә ярдәм иткән актив волонтерларны 16 номинация буенча бүләкләделәр. Хәзер волонтерлар алдында чираттагы зур эш тора – 2019 елны алар Казанда узачак эшче һөнәрләре буенча «Ворлдскиллс» дөнья чемпионатын үткәрергә булышачак.
Бүген Татарстанда 46 000 волонтер бар.
Комментарийлар