Татарстанда яңа бүләк: тәүге тапкыр «Фидакарь хезмәт өчен» медале бирелде

Михаил Бабич аэропортка килеп төшкәч тә быел апрель аенда Татарстан Республикасы Арбитраж судының яңа рәисе вазифасына керешкән Максим Боровковка таныклык тапшырган.
Шуннан соң Михаил Бабич Рөстәм Миңнеханов белән бергә Тәтеш районындагы Бакырчы авылында “Якташларыбызга, Ватанны саклаучыларга һәм тыл хезмәтчәннәренә мәңгелек хәтер” мемориаль комплексын ачу тантанасында катнашты. Тантаналы чара барышында республикадагы яңа бүләк - “Фидакарь хезмәт өчен” медале беренче тапкыр тапшырылды.

Татарстан Президенты Рөстәм Миңнеханов кулыннан бүләкне беренче булып Бакырчы авылы җирлегендә яшәүче Мөбарәкҗан Таһиров кабул итеп алды.
- Без Бөек Ватан сугышында катнашкан һәм аларга тиңләштерелгән барлык кешеләрне “Фидакарь хезмәт өчен” медале белән бүләкләү турында карар кабул иттек. Алар ике мең ярым кеше. 30 августка кадәр тантаналы рәвештә һәркайсының үзенә медальне тапшырачакбыз, - дип билгеләп үтте Рөстәм Миңнеханов.

Михаил Бабич үз чыгышында мемориальне реконструкцияләү әлеге авылдан чыккан Россия Иминлек советы сәркатибе ярдәмчесе Наил Мохитов ярдәмендә мөмкин булганлыгын билгеләп үтте.
- Бакырчы авылыннан сугышка 343 кеше киткән һәм бары 138е генә исән килеш әйләнеп кайткан. Без Бөек Ватан сугышы геройлары исеме чокып язылган мемориальне ачабыз. Шулай ук биредә локаль конфликтларда катнашучыларның исемнәре дә уелган. Без барлык геройларны да хәтерлибез, – диде Михаил Бабич.

Тантаналы чарада шулай ук ике Россия Герое – Россия Президенты хакимиятенең эчке сәясәт буенча төбәк сәясәте департаменты җитәкчесе Алексей Романов һәм Ингушетия башлыгы Юныс-бәк Евкуров та катнашты.

Фото: president.tatarstan.ru