“Татмедиа” агентлыгына яңа җитәкче билгеләнде

«Татмедиа» Республика матбугат һәм массакүләм коммуникацияләр агентлыгы җитәкчесе вазифасына Айдар Сәлимгәрәев билгеләнде. Моңа кадәр ул Татарстан Республикасы Президенты Аппаратының мәгълүмат-аналитика идарәсен җитәкләде.

Исегезгә төшерәбез, 2015 елдан бирле «Татмедиа» Республика матбугат һәм массакүләм коммуникацияләр агентлыгы җитәкчесе вазифасын башкарган Айрат Зарипов Дәүләт Советына депутат булып сайланды – мәгариф, мәдәният, фән һәм милли мәсьәләләр комитетын җитәкләде.

Бүген Айдар Сәлимгәрәевны коллективка “Татмедиа” филиалларына автомобильләр тапшыру вакытында тәкъдим иттеләр.

Сәлимгәрәев Айдар Сәетгәрәй улы 1971 елның 3 августында Татарстан АССРның Мөслим районы Мөслим авылында туган.

Белеме – югары: 1994 елда В.И. Ульянов-Ленин исемендәге Казан дәүләт университетының журналистика факультетын тәмамлый (белгечлеге – журналист).
Хезмәт юлын 1988 елда «Мөслимагропромэнерго» да эшче булып башлый.

1994 - 1997 - «Татарстан» республика мәгълүмат баш редакциясендә хәбәрче, бүлек мөхәррире, баш мөхәррир.
1997 - 1998 - «Түбән Кама шәһәре телерадиокомпаниясе» җаваплылыгы чикләнгән ширкәте өлкән мөхәррире.
1998 - 2000 – Түбән Кама халык депутатларының берләштерелгән советы аппараты белгече.
2000 - 2003 – Түбән Кама районы һәм Түбән Кама шәһәре администрациясе каршындагы «Түбән Кама телерадиокомпаниясе» коммуналь учреждениесе директоры.
2003 - 2006 – Татарстан Республикасы «Татмедиа» массакүләм коммуникацияләр агентлыгы дәүләт учреждениесе директоры.
2006 - 2008 – Татарстан Республикасы «ТАТМЕДИА» массакүләм коммуникацияләр агентлыгы генераль директоры урынбасары.
2008 - 2009 - «Татмедиа» җаваплылыгы чикләнгән җәмгыяте генераль директорының беренче урынбасары.
2009 - 2012 - «Татмедиа» җаваплылыгы чикләнгән җәмгыяте генераль директоры.
2012 - 2014 - Татарстан Республикасы мөселманнары Диния нәзарәте үзәкләштерелгән дини оешмасы аппараты җитәкчесе.
2014 - 2015 - «ПРОСТО МОЛОКО» идарәче компаниясе җаваплылыгы чикләнгән җәмгыяте генераль директоры урынбасары.
2015 - 2018 - Татарстан Республикасы Президентының Эчке сәясәт мәсьәләләре департаменты җитәкчесе урынбасары – Департаментның иҗтимагый проектлар бүлеге мөдире.

2018 елның февраленнән - Татарстан Республикасы Президентының Мәгълүмат-аналитика идарәсе башлыгы.

Өйләнгән, кызы һәм ике улы бар.