«ТАТМЕДИА JUNIOR» кысаларында эшләүче «Күңелле әлифба» проекты икенче сезонын башлады

Шул арада нинди генә кызыклы вакыйгаларга юлыкмады да, кайсы гына хәрефне авыр хәлдән коткармады алар!  «Ү» хәрефен үрмәкүч алып киткән, «Ф» филләр янында адашып калган иде. Кайбер хәрефләр Зөбәйдәнең үзен дә сихерләде хәтта! Зөбәйдә, Алмаз һәм татар алфавиты хәрефләре маҗаралары белән барлыгы 38 видео төшерелде. Алар YouTube та инде 16 меңнән артык карау җыйган.

Хәреф белү белән генә эш бетми шул. Хәрефләрдән иҗекләр төзеп, иҗекләрне сүзләргә тезеп укырга өйрәнәсе дә бар. Шуңа да «Салават күпере» журналы редакциясе «Күңелле әлифба» проектының икенче сезонын башлап җибәрде. Ул «Күңелле әлифба. Укырга өйрәнәбез» дип атала. Яңа видеоларда Зөбәйдә белән Алмаз «КидСпейс» балалар үзәгендә төрле һөнәрләр үзләштерә, шул арада хәрефләрдән иҗекләр төзеп укырга да өйрәнә. Уен-дәресләр танылган логопед, педагог Надежда Жукова методикасына нигезләнеп эшләнгән.

«Д», «Б», «Ч» хәрефләренә багышланган чыгарылышта, мәсәлән, Зөбәйдә – күз табибы, ә Алмаз Гәрәев көн буе тиктокта видео төшереп, күзләрен авырттырган бабай ролендә. Бабай күзендә моңарчы бер кешедә дә булмаган нәрсәләр бар? Зөбәйдә бабайга ярдәм итә алырмы? Әлеге сорауларга җавап – «Күңелле әлифба» YouTube каналында.