Тәүлек дәвамында сакта

– Җәмәгать иминлеге тәүлек дәвамында уяу сакта. Казан кич­ләренә курыкмыйча керегез, – дип, ышандырып җавап кайтарды журналистларга Россия Эчке эшләр министрлыгының Казан шәһәре буенча идарәсенең патруль-пост хезмәте полкы командиры Сергей Чанкин.

Башкалада көн саен җәмәгать имин­леге сагына полициянең 200 хезмәткәре баса: 50 авто һәм 20 җәяүле патруль.

– Татарстан Президенты һәм хөкүмәте ярдәмендә безнең полк­ның техника паркы, компьютер аппаратлары белән җиһазланышы бик яхшы. Күрше республикалардан Универсиада һәм Футбол буенча дөнья чемпио­наты матчлары вакытында Казанга ярдәмгә килгән полиция хезмәткәрләре, безнең матди-техник базаны күреп, ак көнләшү белән көнләштеләр. Халыкара спорт чаралары имин узды, кунакларга һәм чит ил туристларына һөҗүм итүләр булмады, – диде полиция полковнигы Сергей Чанкин.

Казанда урамнарга һәм ишегалларына «Имин шәһәр» программасы кысаларында, инде 1494 видеокамера урнаштырылган. Шул видеокамералар ярдәмендә быелның сигез аенда 109 җинаять ачылган. Казанның патруль-пост хезмәте хезмәткәрләре, тулаем алганда, быелның сигез аенда 639 җинаятьне ачкан, шуның 228е «кайнар эздән».

Патруль-пост хезмәте полкының беренче командиры Николай Иваниловны зур хөрмәт йөзендә хәтердә тоталар полкта.

– Безнең полкта 700 кеше, шуның 83е – хатын-кызлар. Армия хезмәтен узган 35 яшькә кадәрге ир-атлар рәхим итеп безгә эшкә килсен. Рядовойларның хезмәт хакы – 30, ә офицерларныкы 40-50 мең сум, хезмәт дәвамында фатир алу мөмкинлеге дә бар, – диде Сергей Чагин.

Автор фотолары