Авыруларны вакытында кисәтү күп очракта аларны булдырмаска ярдәм итә. «Шәһри Казан» газетасы редакциясе, Республика медицина профилактикасы үзәге белән берлектә, авыруларны кисәтү буенча махсус проект башлады. Бу юлы Дәрвишләр бистәсендәге 22нче мәктәптә чыгарылыш сыйныф укучыларына наркомания, тәмәке тартуның зыяны турында сөйләдек.
«Общее дело» республика үзәге волонтеры, Республика наркология диспансерының штаттан тыш хезмәткәре Денис Кропотов әйтүенчә, алкоголь, тәмәке тарту – наркотикларның бер төре. Яшьләр арасында популярлашкан электрон сигаретлар да зыянсыз булып тоелсалар да, аларда никотин бар. Электрон сигарет төтенен 10-15 тапкыр сулау бер тәмәке тартуга тиң икән. Өстәвенә, бу төтендә үпкә рагы китереп чыгарырга мөмкин булган авыр металлар да бар. Укучыларга наркотикларның зыяны турында фильм да күрсәтелде. Кызганыч, илдә җитештерелә торган наркотикларның 21 проценты Россия аша уза. Бүген наркоманнарның уртача гомер озынлыгы – 5-6 ел. Шуңа да бу афәткә баш миен зарарларга, акылны томаларга ирек бирмәскә кирәклегенә дә басым ясалды. Гадәттә, наркотикларны нинди максатларда тәкъдим итәләр: наркотик куллана башлаган кеше моның начар икәнен аңлый. Үзе генә газапланмас өчен, ялгызы үләргә теләмичә, артыннан башкаларны да ияртергә тели. Яки наркотик кулланучының аны сатып алырга мөмкинлеге юк. Шуңа да ул хәллерәк кешеләрне җәлеп итеп, үзенә акча булдыра. Өченче төркем – наркотикларны акча эшләү максатыннан сата.
– Наркотиклар колына әйләнмәс өчен, әйләнә-тирәдәге кешеләрне сайларга, начар компанияләргә иярмәскә, әгәр дә наркотик тәкъдим итсәләр, бу кешеләрдән качарга, аралашмаска, аек акыл белән яшәргә кирәк, – ди Денис Кропотов.
Комментарийлар