Виталий Мутко: «Бар өмет Казанда бүген»

- Казан һәрвакыт безнең өметләрне аклады. Ул лаеклы рәвештә илнең спорт башкаласы булып тора. Биредә зур спорт чаралары оештырыла. Монда аны югары дәрәҗәдә үткәрә дә беләләр. Бүгенге матч вакытында да бар өмет Казанда. Җанатарлар үз энергиясен футболчыларга да җиткерә алыр, - диде Виталий Мутко.

Җитәкче сүзләренчә, соңгы елларда Россия җыелмасы җиңүгә таба зур адымнар белән бара.

- Хәзер без составны үзгәрттек. Фикерли белүче, амбицияле тренерыбыз бар. Җанатарлар да безгә ышана. Моны Португалия белән булган матч күрсәтте. Уеннан соң халыкның кул чабуы гына да ни тора?! Җиңелсәң дә, футбол кырыннан башны югары күтәреп китәрлек итеп уйнарга кирәк, - ди Виталий Мутко.

Ул Конфедерацияләр Кубогы вакытында беренче тапкыр кертелгән видеокабатлауларга да үз фикерен белдерде. Әлегә ул футбол дөньясында эксперимент буларак кына эшли. Ярышлар тәмамлангач, аны кертү-кертмәү мәсьәләсен караячаклар. Россия Футбол федерациясе дә ил чемпионатында әлеге программаны кулланмакчы. Хәзерге вакытта ФИФА белән сөйләшүләр алып барыла.

- Видеокабатлауны әле ахыргача уйлап бетерергә кирәк. Телевизордан голны ни өчен санамаганнарын аңлап була, ә стадиондагы тамашачы моны күрми кала. Ләкин бер шиксез видеокүзәтү футболны гаделрәк ясый, - ди Виталий Мутко.

Вице-премьерның киләсе сезонда «Рубин»ның да күтәрелүен күрәсе килә.

- Илнең 16 клубы да үзара көндәшлеккә сәләтле булырга тиеш. «Рубин»ның икътисади базасы да, материаль базасы да яхшы. «Казан-Арена» стадионы гына да ни тора! Команда Россия чемпионы да була алды, «Барселона»ны да җиңде. Кызганыч, соңгы вакытта күп нәрсәгезне югалттыгыз. Хәзер клуб премьер-лигада 9нчы урында бара. Яңа җитәкче килгәч, кабат үз исемен кайтырыр дип уйлыйм, - диде Виталий Мутко.

Ул үзебезнең спортчыларны үстерү яклы. Читтән килгән спортчыларның санын чикләү дә дөрес гамәл ди.

- Үз футболчыларыбызны уйнатмасак, Россиядә беркайчан да футбол булмаячак. Чикләүләр булмаса, һәр акчалы клуб читтән генә футболчылар алып уйнар иде. Безнең Головин, Васиннар булмас иде. Мәктәп кенә бетергән егет легионерлар белән көндәш була алмый. Ә биредә аларга мөмкинлек бирелә. Безгә балалар-яшьләр футболына кайтырга кирәк. Без Германия футбол берлеге белән килешү төзедек. Аның нигезендә 50 мәктәптә тормышка ашырылачак программа булдырдык. Быел сәләтле балаларны эзләү өчен 100 миллион сум акча тотачакбыз. Иң сәләтле 14 яшь футболчыны әзерли башлыйбыз, - ди Виталий Мутко.