XVII Казан халыкара мөселман киносы фестиваленә гаризалар кабул итү башланды

Эшләрне җыю июль башына тәмамланачак, ул вакытта конкурс программасы игълан ителәчәк. Тамашачыларны шулай ук конкурстан тыш һәм параллель программа көтә: Россия уен, документаль һәм анимацион киносының иң яхшы үрнәкләре, ретроспектив һәм тематик сайлаулар.

Фестиваль кысаларында иҗади очрашулар, түгәрәк өстәлләр, матбугат конференцияләре планлаштырылган. Биредә шулай ук кинофестиваль-партнерлар өчен инвестиция-презентация мәйданчыгы, эшлекле мәйданчык һәм башкалар булачак.

Катнашу өчен гаризаны чараның рәсми сайтында бирергә мөмкин.

Казан халыкара мөселман киносы фестивале Татарстан башкаласында 2005 елдан бирле уза. Беренче фестиваль Россия мөфтиләр шурасы, РФ Мәдәният һәм кинематография федераль агентлыгы, ТР Президенты ярдәмендә ТР Мәдәният министрлыгы инициативасы белән оештырылды. Фестиваль үзенең яшәү дәверендә кинематографистларның абруйлы форумы статусына ия булды.

Казан халыкара мөселман киносы фестивале «Через диалог культур к культуре диалога» девизы астында уза. Быел кинофорум Татарстан Республикасы Президенты Рөстәм Миңнеханов ярдәме белән һәм «Россия – ислам дөньясы» стратегик караш төркеме белән партнерлыкта узачак, дип хәбәр итә Татарстан Республикасы Мәдәният министрлыгының матбугат хезмәте.