Яңа Арыш авылында иң өлкән ветеранны котладылар

Балык Бистәсе районының Яңа Арыш авылында яшәүче Бөек Ватан сугышы ветераны Шиһабетдин Мусин 90 яшьлеге уңаеннан котлаулар кабул итте. Яңа Арыш авылында ул иң өлкәннәрнең берсе.

Ветеранны беренчеләрдән булып иң билгеле авылдашы - Татарстан Республикасы Президенты Рөстәм Миңнеханов тәбрикләде. Республика башлыгы исеменнән бүләкләрне аңа Мәдәниятне үстерүгә ярдәм фонды башкарма директоры Нурия Хашимова тапшырды. Президент котлау хатында Шиһабетдин Мусинга сәламәтлек, рух ныклыгы һәм озын гомер теләгән.

Шиһабетдин абый озак вакыт Нургали Миңнеханов белән иңен иңгә куеп эшләгән. Хезмәт юлын гади урманчы эшеннән башлаган, колхоз бригадиры да булып өлгергән. Аңа кадәр Бөек Ватан сугышы фронтларында батырларча сугышкан. Сталинград сугышында көч-хәл белән исән калганы турында ул әле дә искә ала.

Тәбрикләү сүзләрен ветеранга шулай ук Татарстан Хезмәт һәм социаль яклау министры урынбасары Энҗе Нигъмәтҗанова һәм Балык Бистәсе районы башкарма комитеты җитәкчесе Рашат Хәбибуллин да җиткерде.

Иң мөһим котлауларны ветеран үзенең күпсанлы гаилә әгъзаларыннан кабул итте. Төп нигездә бер өстәл артында аның биш баласы, унике оныгы һәм унөч оныкчыгы җыелды.

10 ел элек паралич сукканнан соң, хәрәкәтләнү мөмкинлеге чикләнсә дә, Шиһабетдин абый бүген дә көчле рухта, якыннарын сөендереп, актив тормыш алып бара. Махсус коляскасында көн саен мәчеткә йөри, туган авылы тормышын күзәтә, авылдашлары белән тәҗрибә уртаклаша һәм мәктәп укучыларын кызыклы хикәяләре белән шатландыра.

Шиһабетдин Мусин әйтүенчә, гомеренең иң авыр чакларында нәкъ менә гаилә бердәмлеге, аның ныклы тылы ветеранга чын терәк булган. Тормыш иптәше һәм гаиләсе бүген дә аңа сәламәтлеге белән булган бәлаләрне җиңәргә булыша.