Йолдыз Миңнуллина белән Рәдиф Кашаповның "Ике күләм" альбомы интернетка чыкты

"Ике күләм" альбомында Миңнулинаның шәһәр рифмалары Кашаповның җитез электроникасы белән үрелеп бара. Треклар синтезаторлар, гиталаралар, драм-машиналар һәм башка уен кораллары һәм техник җиһазлар ярдәмендә язылган.

Альбомның треклары YMRK акронимы белән бирелгән, ул Йолдыз Миңнуллина һәм Рәдиф Кашапов исемнәренең баш хәрефләреннән алынган аббревиатура.

"Альбомны яздыру идеясе 2015 елдагы JADIDFESTтан соң туды, анда 25 кеше 3 сәгать буе Һади Такташның шигырьләрен укыган иде. Аларның фонында минем һәм башкаларның башкаруында музыка уйналды. Катнашучылар арасында Йолдыз Миңнуллина да бар иде. Бу чарадан соң мин аңа бергәләп альбом яздырырга тәкъдим иттем. Ул ризалашып, проектка үзенең 11 шигырен сайлап алды. Аларга карап, мин үземнең композицияләремне көйли башладым", - дип сөйләде Рәдиф Кашапов "Татар-информ" хәбәрчесенә.

Кашапов сүзләренчә, күп кеше шагыйрә Йолдыз Миңнуллинаның образын күбрәк гитара, бард җырлары, рок-музыкага тиңли. Ләкин музыкант аны халыкка яңа форматта тәкъдим итәргә теләгән.

Интернетта тәкъдим ителгән альбомда 11 трек, алар арасында - "Пәрдәдә дә, тәрәзәдә дә калсын", "Арттан йөри шәһәр урамнары", "Бозлы тәрәзәдә бармак эзе" һәм башка композицияләр. Альбомны түләүсез тыңлау һәм композицияләрне күчереп алу мөмкинлеге бар.

Йолдыз Миңнуллина (1985) - шагыйрә. Казанда туган. 2011 елда Татарстан китап нәшриятында «Күк тирмәсе» дип аталган шигырьләр җыентыгы дөнья күрде. «Яңа татар пьесасы-2007» бәйгесендә өченче премиягә лаек булды. 2011-2016 елларда "Ялкын" журналының баш мөхәррире.

Рәдиф Кашапов (1982) - музыкант, язучы һәм журналист, «КЗН.Собака.ru» порталы баш мөхәррире. "Стереолистья" романы авторы, "Тамгалар" альбомын чыгарды. Бөтендөнья татар яшьләре форумы рәисе урынбасары.

^{"Татар-инфор"}