1-9 майларны тоташ ял көннәре итәргә, диләр

Дәүләт Думасы депутаты Игорь Антропенко («Бердәм Россия») шундый тәкъдим белән чыкты. Бу хакта ТАСС агентлыгы хәбәр итә.

Ул билгеләп үткәнчә, җитештерү календаренда 1 майдан 9 майга кадәр өзлексез ял көннәрен билгеләү максатка ярашлы булыр, бу гражданнарга дача сезонына тынычлап әзерләнергә һәм участокларда кирәкле эшләр белән шөгыльләнергә мөмкинлек бирер иде.

Аның сүзләренчә, бәйрәм атнасы эчендә эшкә чыгу кешеләргә тынычлап ял итәргә комачаулый, чөнки күп вакыт юлга китә. Антропенко билгеләп үткәнчә, хезмәткәрләр бәйрәмнәр арасында барыбер ял ала һәм бу эш бирүчеләрнең ачуын чыгара. Шул ук вакытта, ул әлеге тәкъдимнең сменалы эшкә кагылмавын искәртте. Депутат шулай ук бу мәктәп укучыларына һәм студентларга, бигрәк тә имтиханнарга әзерләнүчеләргә файдага булыр иде, дигән фикерен белдерде.

Хәбәр иткәнебезчә, Татарстан Рәисе Рөстәм Миңнеханов быелгы май бәйрәмнәрендә иминлек мәсьәләләренә игътибар итәргә кушты.

Чыганак: Татар-информ