9 майда бәйрәм чаралары: Парад, оффлайнга кайткан “Үлемсез полк” һәм 6 минутлык салют

Бәйрәм чаралары хакында бүген ТР Министрлар Кабинетында Казан Башкарма комитетының мәдәният идарәсе башлыгы Азат Абзалов сөйләде. 

Бәйрәм Парады Меңьеллык мәйданында 10.00дә башланачак. Тамашачыларны иртәрәк килеп, уңайлы урын сайларга өндиләр. Быел Парадта катнашачак Казан гарнизоны гаскәрләре саны арткан. 

Шулай ук 9 майда Үзәк Стадион янында Татарстан Республикасы кунаклары һәм халкы өчен ике мәйданчыкта гражданнар һәм хәрби техника күргәзмәсе эшләячәк. Аны 11 майга кадәр карарга мөмкин.

Биредәге кичке программа 19.00дә башланачак. Ул “Җырлаучы Казан”, “Җырлаучы Татарстан” форматында булачак. Барча кеше бергәләп сугыш җырларын башкара алачак. 

Соңгы ике елда онлайн режимда узган  «Үлемсез полк» йөреше быел оффлайнга кайта. Маршруты исә элеккегечә кала – катнашучылар Карл Маркс урамыннан – Ирек мәйданыннан башлап, Аграр академиягә таба, аннары Лобачевский, Кремль урамнары буйлап узачак һәм Меңьеллык мәйданына төшәчәк, дип белдерде Казан Башкарма комитетының мәдәният идарәсе башлыгы Азат Абзалов. Аның сүзләренчә, “Үлемсез полк” йөрешенең башлану вакыты 15.00 сәгатькә планлаштырылган. Әмма барлык керү нокталары 12.00 сәгатьтән ачык булачак. Халыкка алданрак килергә киңәш ителде.

«Үлемсез полк» маршруты буенча транспорт чикләүләре 10.00 сәгатьтән гамәлдә булачак. Шуңа бәйле рәвештә «Корстон» сәүдә-күңел ачу үзәге ягыннан Карл Маркс урамына кадәр җәмәгать транспортының боҗра маршрутын эшләтеп җибәрәчәкләр.

Бәйрәм салютын 22.00дә Казансу акваториясенең алты ноктасыннан атачаклар. Ул алты минуттан артык дәвам итәчәк. Елга аръягында һәм шәһәрнең үзәк өлешендә салют теләсә кайсы ноктадан диярлек күренәчәк, өлешчә — Совет районында, дип вәгъдә иттеләр. 

Татарстан Рәисе Рөстәм Миңнеханов иминлек мәсьәләләрен үзәккә кую мөһимлеген ассызыклый. Чаралар узачак урыннарны һәм аларга якын территорияләрне мәҗбүри рәвештә тикшерәчәк. Техник чаралар һәм этләр җәлеп ителәчәк, дип сөйләде Татарстан буенча Эчке эшләр министрлыгының полиция башлыгы урынбасары Александр Мищихин.