“Алтын мөнбәр” XXI Казан кинофестивален ачу фильмы булып МХО турындагы картина сайланды

Картинаның исеме – “Тимур һәм аның командасы”. Бу хакта фестивальне оештыручылар “Татар-информ”да узган матбугат конференциясендә сөйләп узды.

“Безнең өчен төп бурыч – ел темасына туры килә торган фильм сайлап алу. Быел, әйткәнебезчә, бу Җиңүнең 80 еллыгы һәм Ватанны саклаучылар елы. Без “Тимур һәм аның командасы” фильмын төшерүчеләргә тәкъдим ясадык”,– дип сөйләде фестивальнең башкарма директоры, “Татаркино” җитәкчесе Миләүшә Айтуганова.
 “Алтын мөнбәр” халыкара кинофестиваленең бөтен конкурс программасында Ауропа картиналары артты”,– дип бәйгенең көчле булуын искәртте фестивальнең сайлап алу комиссиясе рәисе, ВГИКның бүлек мөдире Нина Кочеляева.

“Быел жюри рәисе булып “Миллионер из трущоб” фильмы өчен “Оскар”га ия булган Ресул Пукатти сайланды. Шулай ук жюри составында башка күп кенә илләрдән дә искиткеч режиссерлар бар”,– дип билгеләп үтте Миләүшә Айтуганова.
Искәртеп узарга кирәк, быел “Алтын мөнбәр” XXI Казан халыкара кинофестиваленең ачылу һәм ябылу тантаналары Камал театрының яңа бинасында булачак.