Бәрәңге бәясе “космос”ка очуын туктатырга җыеналар

Мондый тәкъдим белән Икътисади үсеш министрлыгы башлыгы Максим Решетниковка Дәүләт Думасы вице-спикеры Борис Чернышов мөрәҗәгать иткән. 

Бәрәңге 2024 елда иң кыйммәтләнгән продукт булды, дип билгеләп үтелә парламентарий мөрәҗәгатендә. Росстат һәм Үзәк Банк мәгълүматлары буенча, узган ел эчендә бәрәңгегә бәяләр 92 процентка арткан — 28 сумнан 57 сумга кадәр, ә 2025 ел башыннан - тагын 24 процентка. 

-    Бәрәңгене икенче икмәк дип атыйлар, шуңа күрә бу социаль әһәмиятле продуктка бәяләрнең җитди артуы миллион гаилә бюджетына йөкләнешне сизелерлек арттыра. Традицион рәвештә арзан ризык булып санала торган бу яшелчә 2024 елда гына да 2 тапкырга диярлек кыйммәтләнде, - дип аңлатты Чернышов. 

Дәүләт Думасы вице-спикеры Россиядә 90 көнгә кадәр социаль әһәмиятле азык-төлеккә бәя чикләүләрен кертергә мөмкинлек бирә торган карар гамәлдә булуын искәртте. Бу 60 көн рәттән продуктның бәясе 10 процентка һәм аннан да күбрәккә үссә мөмкин. 

Исегезгә төшерәбез, мартта дүрт атна рәттән бәрәңге Татарстанда азык-төлеккә бәяләр үсеше буенча лидерлар өчлегенә керде – 24 февральдән 24 мартка кадәр аның бәясе 53,5 сумнан 62,6 сумга кадәр артты.