Кем буласыңны алдан белеп була

Студентлар отрядлары аша ел саен 15 меңнән артык студент эш урыннары белән тәэмин ителә. Элеккеге чорда студентлар отрядлары танышу, аралашу мәйданы булса, хәзер исә ул бөтенләй башка юнәлешләрне колачлый.

– Мин Яшьләр министрлыгында гына эшләмим, ә Казан Федераль университет белән Авыл хуҗалыгы университетларында да укытам. Студентлар белән эшләвем аларга ни кирәген аңларга һәм күрергә ярдәм итә, – ди республиканың Яшьләр эшләре министрының беренче урынбасары Софья Альфредовна Галиева-Мостафина.

Хәзерге студентлар өчен уку барышында мөмкинлекләр бихисап күп, бары үзеңне сынап карарга гына кирәк. Россия күләмендә эшләп килүче студентлар отрядлары яшьләр өчен киләчәктә якты юл булуы ихтимал. Практика узган вакытта студент бу эштә киләчәктә үзен ничек күрә, шуны тоемлый ала. Бу һөнәрне үзләштергәннән соң, хезмәт базарында үзенә эш урыны таба алачакмы? Нәкъ тә менә студетлар төрле юнәлештәге хезмәт отрядларында эшләп, үзенең киләчәген билгели ала. “Без киләчәктә җитештерү, педагогика отрядлары гына оештырып калмыйча, башка кызыклы юнәлешләрне дә җәелдерергә җыенабыз”, – диде Софья Галиева-Мостафина.

Республика Рәисе тәкъдиме белән студентларны эшкә урнаштыруда яңа мөмкинлекләр тудырырга җыеналар. Шулай ук “Яшьләр һәм балалар” илкүләм проекты нигезендә кызыклы проектлар гамәлгә ашыр, дип көтелә.