Татарстан укучыларына билгеле бер фәннәрне өйрәнгән өчен акча түли башлаячаклар

Барлыгы премияләргә 200 укучы дәгъва итә ала. Аның күләме 57,5 мең сум тәшкил итә, диелгән Министрлар Кабинетының расланган карарында.

Премия 5-7 сыйныфлардагы 50 укучы, 8-9 сыйныфлардагы 50 укучы һәм 100 өлкән сыйныф укучысы өчен каралган. Премиягә дәгъва итүчеләр физика-математика түгәрәкләрендә, профильле олимпиадаларда, форумнарда, тематик конкурсларда катнашырга тиеш. Шулай ук физика, математика һәм информатика өлкәсендәге интеллектуаль эшчәнлек нәтиҗәләре исәпкә алыначак. Укучының бу фәннәр буенча өлгереше 4,5 баллдан да ким булмаска тиеш. 

Шул ук вакытта премиягә халыкара олимпиадаларда, шулай ук Бөтенроссия укучылар олимпиадасының йомгаклау этабында җиңүчеләр яки призерлар дәгъва итә алмаячак. 

Инициатива авторлары фикеренчә, акчалата бүләкләү физика, математика һәм информатиканы өйрәнүне популярлаштыруга ярдәм итәчәк, шулай ук укучыларны физика-математика вузларына керүгә этәрәчәк. Документта «физик-математик алгарыш» проекты кысаларында республика бюджетыннан финанслау каралган.

Билгеле булганча, Татарстанда мәгариф өлкәсе республика Рәисе Рөстәм Миңнеханов тарафыннан да кайгыртучанлык күрсәтелә торган өлкә булып санала.