Ветераннарга нинди социаль ярдәм чаралары каралган?

Бүген ТР Министрлар Кабинетында узган брифингта Татарстан Хезмәт, халыкны эш белән тәэмин итү һәм социаль ярдәм министры урынбасары Наталья Бутаева Җиңүнең 80 еллыгына каралган түләүләр һәм ветераннарга ярдәм чаралары турында сөйләде.

Ул искәртеп узганча, Җиңүнең 80 еллыгын бәйрәм итү уңаеннан федераль дәрәҗәдә Россия Федерациясе гражданнарының кайбер категорияләренә 55 мең сум һәм 80 мең сум күләмендә бер мәртәбә бирелә торган түләүләр билгеләнде.

Татарстан Рәисе Рөстәм Миңнеханов карары белән Татарстанда республика бюджетыннан федераль түләүгә өстәмә рәвештә бер тапкыр бирелә торган акчалата түләү каралган:

- Бөек Ватан сугышы инвалидларына һәм катнашучыларына, балигъ булмаган концлагерь, гетто тоткыннарына, шулай ук блокададагы Ленинград, камалышта калган Севастополь һәм Сталинград халкына 50 мең сум күләмендә;
- вафат булган (һәлак булган) Бөек Ватан сугышы инвалидларының һәм Бөек Ватан сугышында катнашучыларның тол хатыннарына, тыл хезмәтчәннәренә 10 мең сум күләмендә.

Шул рәвешле 300 кеше 50 мең сум күләмендә, 8 521 кеше 10 мең сум күләмендә бер тапкыр бирелә торган түләүләр алды.

Моннан тыш, муниципаль берәмлекләргә сугыш ветераннарына, тыл хезмәтчәннәренә һәм һәлак булган ветераннарның тол хатыннарына тапшыру өчен 8 837 азык-төлек җыелмасы таратылган.

Социаль ярдәм чараларына килгәндә:
- ветераннарга торак һәм коммуналь хезмәтләр өчен түләүдә ташламалар каралган (түләү бәясенең 50 проценты күләмендә).
- Бөек Ватан сугышында катнашучылар һәм хәрби хезмәт бурычларын үтәгәндә алган яралары, контузияләре яки имгәнүләре аркасында инвалид булган ветераннар протезлар (теш протезларыннан тыш) һәм протез-ортопедик әйберләр белән тәэмин ителәләр.
- Татарстан Республикасы бюджеты исәбеннән тыл хезмәтчәннәре айлык акчалата түләү (2025 елда – 939 сум), түләүсез теш протезлары һәм колак протезлары белән тәэмин ителә.
- Шулай ук навигация чорында ТР шәһәр яны су транспортында йөрүгә 50 процент ташлама бирелә.