Татарның моңланган чагы: Казанда Илһам Шакиров исемендәге премияләр тапшырылды

Әлеге премия исә быел тәүге тапкыр гына бирелә. Алга таба да аны һәр ике ел саен республикабызның мәдәнияте үсешенә – аеруча татар җырына өлеш керткән артистларыбызга тапшырып торачаклар. 

Быел премиянең өч номинациясенә дәгъва кылучыларның саны 27 иде. Гариза тапшыручылар арасында Татарстанның халык артистлары белән беррәттән, яшь буын вәкилләре булуы да билгеле.
- Илһам абый үз вакытында Консерватория бетергән кеше. Шуңа күрә премиягә сайланучыларыбызның да академик белем дәрәҗәсендә булулары  төп таләп иде. Алга таба номинантларның 10 елдан да ким түгел мәдәнияткә хезмәт итүләре һәм халык күңеленә якын булуларына игътибар бирдек. Аннан соң Илһам абыйның репертуарыннан, халык җырлары, классик композиторларның әсәрләрен башкару да бик мөһим таләп, дип саныйм. Алда әйткән таләпләр ир-ат һәм хатын-кыз вокалы номинацияләренә карый. Премия тапшыралачак өченче – халыкчан җыр номинациясен яулаган җиңүчебез дә бар. Ул инде үзешчән, һәвәскәр артистыбызга бирелә, – дип сөйләде премиянең жюри әгъзасы - композитор Риф Гатауллин.

Премия хатын-кыз вокалы буенча Татарстанның халык, Россиянең атказанган артисты Резедә Галимовага, ир-ат вокалы буенча Татарстанның артказанган артисты Филүс Каһировка һәм халыкчан җырчы номинациясендә җиңгән Флер Шакировка бирелде. Җиңүчеләр диплом, символик медаль һәм 200 мең сум акча белән бүләкләнделәр. 

Тантана җыр һәм инструменталь музыка белән үрелеп барды. Танылган театр артистларыбыз Илһам Шакировка багышлап шигырь юллары һәм әдәби әсәрләдән өзекләр укыды. 

Алсу Мансурова