Безнең тик торганыбыз юк

– Без, “Ромашка” балалар бакчасы коллективы, барлык тәрбиячеләребез белән конкурс барышында яхшы эш нәтиҗәләре күрсәттек. Комиссия әгъзаларына һәр группа балалары ана телендә шөгыльләр күрсәтте, балалар белән чиста татар телендә әңгәмә оештырылды, балалар үзебезнең татар язучыларының шигырьләрен, әкиятләрен сөйләделәр, татар телендә җырлар башкардылар, сабыйларның рәсем һәм кул хезмәте күргәзмәсе корылды, тәрбиячеләребезнең рецензияләнгән проект эшләре, еллык, көнлек һәм перспектив эш планнары өйрәнелде, режим моментларының ни рәвешле татар телендә оештырыруы күзәтелде, ата-аналар белән башкарылган эшчәнлегебез каралды, – диде Ләйсән Мәрданова.

– Ләйсән ханым, моңарчы мондый масштаблы бәйгеләрдә беренчелек яулаганыгыз булдымы?
– Булды. Безнең, гомумән, тик торганыбыз юк. Гел кайда да булса эшебезне күрсәтеп, көчебезне сынап торабыз. 2015 елда Татарстан Республикасы фән һәм мәгариф министрлыгы иң яхшы белингваль балалар бакчасына бәйге игълан иткән иде. Без бу бәйгедә җиңүче булдык. 1 миллион сум грант оттык.

– Сезнең башка бакчалардан өстенлегегез нәрсәдә?
 – Безнең бакчада белем һәм тәрбия бирү татар телендә алып барыла. Бөтен эшчәнлек телне саклауга юнәлтелгән. 6 төркемгә 151 бала йөри. Безнең педагогик коллективның 95 проценты – категорияле тәрбиячеләр. Һәркайсы татар телендә үз проект эшчәнлеген төзеп, балалар белән эшләп килә. Бу методик эшкәртмәләр белән комиссия каршында бик лаеклы рәвештә имтихан тоттык. Комиссия әгъзалары балаларның тел байлыгы, сафлыгы дәрәҗәсен ачыклау нияте белән һәрберсе белән индивидуаль әңгәмә корды. Әйтергә кирәк, балалар үзләрен бик яхшы яктан күрсәттеләр. Югалып калмадылар. Теләсә кайсы сорау алдында тулы, матур җавап тоттылар. Татар телендә иркен итеп фикерләрен әйтә белделәр. Бакчабызга министр тарафыннан кайтарылган «Туган телдә сөйләшәбез» укыту методик комплектын ничек, ни рәвешле куллануыбызны демонстрацияләп күрсәттек. Балаларда туган телгә мәхәббәт, ихтирам тәрбияләү йөзеннән ел дәвамында бакчабызда системалы рәвештә төрледән-төрле чаралар уздырылып тора. Инстаграм челтәрендә бакчабызның үз битен булдырдык. Аны актив рәвештә алып барырга, сыйфатлы, кызыклы контент булдырырга тырышабыз.

 – Бәйгенең бүләге – 500 мең сумлык премия. Әлеге керемне нинди юнәлештә файдаланырга ниятлисез?
– Бакчабыз откан премияне, Алла боерса, балаларда туган телебезне саклау, аны өйрәнү, милли гореф-гадәтләребезгә карата мәхәббәт тәрбияләү юнәлешендә максатчан тотарга планлаштырабыз. Тәрбиячеләребезне ноутбуклы итә алсак, яхшы булыр иде. Сабыйларга музыка кораллары, спорт белән шөгыльләнү өчен җайланмалар, логопедик комплекс булдырырга иде. Уен һәм шөгыль бүлмәсен заман таләпләренә яраклаштырырга кирәк. Татар телендә стендлар һәм башка төрле ярдәмлекләр булдырырга ниятләп торабыз.

Регина Габдрахманова