#Мәгариф 22 декабря 2021, 14:34 Уку өчен 2 минут

Суытты. Мәктәпкә бармасаң ярыймы?

22 декабря 2021, 14:34

Уку өчен 2 минут

Татарстан Мәгариф һәм фән министрлыгы муниципалитет бүлекләре һәм мәгариф идарәләре җитәкчеләренә һава температурасы түбән булу сәбәпле, уку дәресләрен туктату мөмкинлеге турында тәкъдимнәр юллады. Бу хакта ведомствоның матбугат хезмәте хәбәр итә. Билгеле булганча, синоптиклар бүген төнлә -25, -30 градус салкыннар көтә, дип кисәтте.

Скопировать ссылку

«Дәресләр авыл мәктәпләренең башлангыч сыйныфларында - 23 градус, шәһәр мәктәпләренең башлангыч сыйныфларында һәм авыл мәктәпләренең 5-9 классларында - 25, шулай ук шәһәр мәктәпләренең 5-9 классларында - 27, авыл мәктәпләренең 10-11 классларында - 30 градус, шәһәр мәктәпләренең 10-11 классларында - 32 градус суык булганда туктатылырга мөмкин», - дип билгеләп үттеләр Мәгариф һәм фән министрлыгында.

Моннан тыш, урамда физкультура дәресләре кече сыйныф укучылары өчен һава температурасы - 3 градустан түбән булганда һәм җилнең тизлеге секундына 6-10 метрдан артканда үткәрелми. Ә өлкән сыйныф укучылары өчен дәресләр -10 градустан да ким булмаган очракта гына үткәрелергә мөмкин.

Министрлык шулай ук муниципалитетлардан һава температурасы -25 градус һәм аннан да түбәнрәк булганда балаларны мәктәп автобуслары белән йөртүне һәм читкә чыгаруны туктатырга тәкъдим итә.

Республиканың мәгариф идарәсе органнары һәм мәгариф оешмалары җитәкчеләренә көчле салкыннар чорында җылылык белән тәэмин итү системаларының эшен контрольдә тотуны көчәйтергә тәкъдим ителде.

Чыганак: Татар-информ

Фото: https://mon.tatarstan.ru

Кызыклы яңалыкларны күзәтеп бару өчен Вконтактега кушылыгыз.