“Балаларның беркатлы булуыннан файдаланырга теләүчеләр бар”

Быел укучылар белән ачыктан-ачык сөйләшү темасы Татарстан Республикасында һәм Россия Федерациясендә игълан ителгән Ватанны саклаучылар елы һәм Бөек Ватан сугышында Җиңүнең 80 еллыгы белән бәйле булачак. Ул “Ватанга хезмәт итү – изге бурыч!» дип исемләнгән.

Парламент дәресе проекты быел инде 17нче тапкыр уздырыла. Ел саен аңа башлангыч бирү алдыннан Татарстан Дәүләт Советы рәисе Фәрит Мөхәммәтшин парламент дәресләрен оештыруда һәм уздыруда катнашкан укытучылар белән очраша. Бу юлы да Парламент бинасында тарих һәм җәмгыять белеме укытучылары җыелды.

Үсеп килүче буында патриотлык хисен тәрбияләүгә, бигрәк тә цифрлаштыру шартларында, аеруча җитди карарга кирәклеген ассызыклады Фәрит Мөхәммәтшин. Бүген фейк хәбәрләр бик күп булуына игътибарны юнәлтте ул. Балалар исә беркатлы, боларның барысын укый, төшенә, үсешебездә комачауларга теләүчеләрне хуплаучылар да табыла, дип борчулары белән уртаклашты ул.

- Парламент дәресе аша тагын бер кат фидакарьлек, бердәмлек һәм патриотизм үрнәге күрсәткән совет халкының батырлыгына сакчыл мөнәсәбәт һәм хөрмәт мөһимлеген күрсәтергә телибез. Ата-аналар һәм укучылар белән бу темага сөйләшергә кирәк. Тарихи дөреслекне саклау, үсеп килүче буынга җиңүнең әһәмияте турындагы белемнәрне, кыйммәтләрне тапшыру - безнең изге бурычыбыз, - дип билгеләп үтте Татарстан Дәүләт Советы рәисе.

Статистик мәгълүматлар буенча, 2015 ел белән чагыштырганда республикада Бөек Ватан сугышы ветераннары саны 81,1 меңнән 9,3 меңгә кадәр кимегән. Бу кешеләр турында безгә һәрвакыт истә тотарга, аларны, шулай ук аларның балаларын һәм оныкларын, мәктәпләргә укучылар белән очрашуларга чакырырга кирәклеге әйтелде.

Быелгы Парламент дәресе темасының актуальлеге махсус хәрби операция үткәрү белән бәйле хәзерге вазгыятькә дә бәйле.

- Бөек Ватан сугышы елларындагы геройларның – лаеклы варислары үсте. Махсус хәрби операция зонасында, хәрби хәрәкәтләрдә, батырлыклар кылучылар тәрбияләнде. Без аларны да хөрмәт итәргә тиеш. Татарстанда махсус хәрби операциядә катнашучылар һәм аларның гаиләләре өчен ярдәм чаралары гамәлдә. Бу мәсьәләләр барлык хакимият органнары игътибары үзәгендә, - диде Фәрит Мөхәммәтшин.

Парламет дәресләренең әһәмиятен Татарстан мәгариф һәм фән министры Илсур Һадиуллин да ассызыклады.

- Ел саен без бу дәресләрне җәмгыять белеме, тарих укытучылары, сыйныф җитәкчеләре һәм башка укытучылар ярдәме белән уздырабыз. Быелгы ачык дәресләрнең темасы аеруча мөһим. Чөнки Бөек Җиңүнең 80 еллыгына багышланган чаралар күбрәк мәктәп, яшь буын белән белән бәйле. Шушы сугышта җиңеп, безгә хәзерге тормышны бүләк иткән ветераннар, тылда хезмәт иткән барлык халык – илебезнең зур горурлыгы. Шул ук вакытта хәзерге вакытта Украинада барган вакыйгалар, дөньядагы, тормышыбыздагы булган үзгәрешләр, безнең илне чолгап алган һәм халыкның фикерен үзгәртергә теләүче дус булмаган илләрнең йогынтысы – боларның барысы да дөрес аңлатуны таләп итә, - дип ассызыклый Татарстан мәгариф һәм фән министры Илсур Һадиуллин.