Һәр бала үлеме - безнең өчен фаҗига

Шәһәр поликлиникаларында белгечләр кабул итүе төгәлләнгәч, таякның юан башы Казанның бердәнбер тәүлек буе эшләүче дәвалау учреждениесенә төшә.
Табиб җилкәсе тимер түгел

Уйлап кына карагыз, хастаханәнең кабул итү-диагностика бүлеге аша елына 150 меңнән артык (!) нәни пациент уза. Биредә 3 меңнән артык хезмәткәр исәпләнсә дә, персонал көн дә зур йөкләнеш белән эшли. Шуңа күрә башкалада тагын бер зур балалар хастаханәсе төзү беренчел бурычларның берсе рәтендә тора.

– Безнең кабул итү бүлегенә йөкләнеш бик югары: 2024 елда 150 меңнән артык мөрәҗәгать булды, шулар арасында госпитализацияләр өлеше 27 процент. Бүлек аша тәүлегенә уртача 400 дән артык кеше үтә. Хәзер үзәк район хастаханәсе баш табиблары белән берлектә педиатрларның урыннарда тәүлек буе кизү торуын тәэмин итү буенча эш башладык, - ди Республика балалар клиник хастаханәсе баш табибы Айрат Зыятдинов.

Саннардан күренгәнчә, республиканың үзәк хастаханәсенә ата-аналар авыру балаларын ешрак кискен халәтләрдә түгел, күбрәк күңелләрен тынычландыру өчен алып килә. Бу бер яктан дөрес тә, әти-әнинең ниндидер борчуы бар икән, соңга калганчы, баланы белгечкә күрсәтеп тынычлану хәерлерәк. Әмма табиблар да тимердән корылмаган. Шуңа күрә аларны мондый көндәлек мәшәкатьләрдән бераз азат итү көннән-көн актуальләшә.

- Хирургияне, билгеле, Республика балалар клиник хастаханәсе җилкәсеннән төшереп булмый. Башка профильләр буенча эшне җиңеләйтү мөмкин. Бу бурычны без якындагы вакытта хәл итәргә тиешбез, - дип саный Татарстан сәламәтлек саклау министры Марсель Миңнуллин да.

Сабый үлеме – гадәттән тыш хәл
Узган елда республикада сабыйлар үлемен киметү өстенлекле бурыч булды. Татарстан тарихта булмаган нәтиҗәгә ирешә алган – 1 мең сабыйга 2,6 үлем туры килгән. Бу Россия төбәкләре арасында бишенче күрсәткеч. Әлеге уңышта Балалар клиник хастаханәсенең өлеше зур булуын билгели министр. Аның сүзләренчә, һәр сабый үлеме ул – гадәттән тыш хәл. Шуңа күрә быел бала гомерләрен саклап калу юнәлешендә эш тагын да көчәйтеләчәк.

- Былтыр Татарстанда туучылар саны 35 мең 319 балага кадәр кимеде, авыр демографик вазгыятьтә һәр яңа туган бала безнең аерым контрольдә булырга тиеш. 2025 елда без өстәмә рәвештә 12 бала гомерен саклап калырга һәм 1000 сабыйга 2,4 сабыйлар үлеме күрсәткеченә ирешергә тиеш, – дип максат куя Айрат Зыятдинов. 

Баш табиб билгеләп узганча, бер яшькә кадәр үлгән балаларның 50 процентын җитлегеп туган нарасыйлар тәшкил итә. Үлем структурасында беренче урында – перинаталь чор авырулары, икенче урында – тумыштан килгән үсеш кимчелекләре, өченче урында – йогышлы авырулар. Балаларның өйдә үлү очраклары да хафага сала, 30 проценттан артыгын стационардан тыш югалтыла. Димәк, яңа туган балаларның патронажын һәм бер яшькә кадәрге балаларны тикшерүне, куркыныч төркемнәрендәге гаиләләргә, бигрәк тә балигъ булмаган аналарга медик-социаль ярдәм күрсәтүне көчәйтү кирәклеге турында җитди уйланырга кирәк. 

Кулларында республика абруе 
Нәни пациентларга көндәлектә медицина ярдәме күрсәтүдән тыш, Республика балалар клиник хастаханәсенең тәҗрибәле белгечләре югары-технологияле операцияләр дә башкара. Монысы инде республика абруен күтәрүдә мөһим урын алып торган мәсьәлә. Республиканың үзәк педиатрия стационарында иң алдынгы техник җиһазлар һәм югары квалификацияле белгечләр тупланган. Барлык бүлекләрдә авыруларны ачыклау, дәвалау һәм реабилитацияләүнең яңа ысуллары гамәлгә кертелә. Травматология, кардиохирургия, нейрохирургия, теш казнасы-бит хирургиясе, уроандрология һәм башка юнәлешләрдә иң прогрессив методикалар кулланыла.

Гомумән алганда, хирургия профилендәге пациентларның гомуми саны узган елда 18,5 мең булган. Бер тәүлектә уртача 52 операция ясалган. Реаниматологлар 9 меңнән артык тапкыр катлаулы пациентларны консультацияләгәннәр, 1800 тапкырдан артык аларга районнарга чыгарга, шул исәптән операцияләр үткәрергә дә туры килгән. 

Хастаханәдә трансплантация хезмәте дә актив үсештә. Ике ел эчендә 22 сөяк мие һәм ике бөер трансплантациясе үткәрелгән. 2025 елдан башлап сөяк мие трансплантацияләре санын елына 18 гә кадәр арттыру, бөер күчереп утыртуны дәвам итү һәм бавыр трансплантациясен гамәлгә кертү ниятләнә. 

Дорфалык бизәми
Россиянең иң алдынгы балалар төбәк клиникалары бишлегенә кергән Балалар республика клиник хастаханәсенә таләпләр зурдан. Дәвалауда гына түгел, пациентларга карата мөнәсәбәттәге хилафлыклар өчен дә башларыннан сыйпамыйлар. Сәламәтлек саклау министры Марсель Миңнуллин, гомумән, медицина хезмәткәрләре арасында дорфалыкны башка сыймаслык хәл дип атый. “Кемгә тупас мөнәсәбәт күрсәтәбез инде без. Баласы өчен кайгырган ата-анагамы? Шулай ярыймы инде?”, - дип министр кабул итү бүлекләрендә эшләгәнннәргә игътибарлырак, җылырак мөгамәләдә булырга чакыра.