Дилә Нигъмәтуллина 80 кунак җыеп туган көн үткәрде: "Чыгымнарны ирем түләде"

Мондый форматтагы мәҗлес эстрадада беренче тапкыр оештырылды. Кунаклар килә торды, Дилә аларны махсус ясалган фотозонада каршы алып фотога төште. Диләне берсеннән-берсе матур һәм затлы чәчкәләргә күмделәр. Әйтерсең, “кемнең чәчәк бәйләме кыйммәтрәк?” бәйгесенә килгәннәр.

Шунысы да бар, бу мәҗлестә махсус дресс-код бар иде: кара, ак, кызыл яки алтынсу төстәге киемнәрдән генә киләсе иде. Туган көн фуршет форматында узды. Ризык бер урында әзерләнгән, теләгән һәркем үзе теләгәнен алып ашый алды. Хәләл табын, спиртлы эчемлекләр булмады. Мәҗлес ахырында туган көн торты да чыкты.

Кемдер ашады, кемдер җырлады. Монда махсус программа юк иде кебек. Һәрхәлдә шулай тоелды. Мәҗлес импровизацион рухта узды. Теләгән кеше Диләне котлады, теләгәне чыгып җырлады. Ниндидер эзлеклелек булмавы бераз сәер булды. Бәлки без мондый форматка ияләнмәгәнгә шулай тоелгандыр. Дилә башлап җибәрде. Кайсы артист дәвам итәр икән? 

Артистлар арасында Татарстанның халык артисты Зәйнәб Фәрхетдинова да бар иде. Кызганыч, ул бер җыр да җырламады. Ләкин үзе әзерләнеп килгән булган. “Флешкам һәрвакыт үзем белән йөри”, - диде. Тик әйтүемчә, бу мәҗлестә беркемне дә сорап җырлатмадылар. Һәркем үзе теләп җырлады. Әйтик, Ришат Фазлыйәхмәтов, Римма Никитина, Сөмбел Билалова, Альбина Апанаева, скрипкачы Иркә, Булат Нигъмәтуллин җырларын бүләк итте. Дилә үзе дә җырлады. Абыйсы Булат белән яңа җырларының премьерасын да тәкъдим иттеләр.

“Дилә электән үк үз йөзен булдырырга тырышты. Һәрвакыт кыяфәте, киенүе, репертуары белән аерылып торды. Сәхнәдә дә бик нәфис. Ул базардан алган киемнән чыкмый. Зәвык белән киенә. Мин моның нәрсә икәнен яхшы беләм, бик авыр ул. Үзем дә киемне иң кыйммәтле тукымалардан гына тегә идем. Бу бик күп акча таләп итә. Дилә кебек берәү дә юк, ул – үзенчәлекле җырчы. Мондый форматтагы туган көн миңа ошады. Бик кызылы аралашу. Югыйсә табын артында сүз биргәнне көтеп утыру да кыен булыр иде. Мәҗлеснең хәләл булуы да ошады”, - диде Зәйнәб Фәрхетдинова.

Туган көн тәмамлангач, Диләнең үзе белән дә аралаштык. Сүз уңаеннан, биш ел элек Диләнең 35 яшьлек юбилеенда да булырга туры килде. Ләкин анысында мәҗлес болай ук масштаблы булмаган иде.

- Дилә, ни өчен 40 яшеңне шулай зурлап үткәрергә булдың?

- Баштан ук туган көнне йә зурлап үткәрәм, йә берәр кая ял итәргә китәм, дип уйлаган идем. Ялга китеп булмады, шуңа күрә туган көнне үткәрергә булдым. Аны Мәскәү дәрәҗәсендә үзенчәлекле итеп, фуршет форматында үткәрергә теләдем.

- Ничә кеше килде?

- 80ләп кеше бар иде. 

- Ни өчен нәкъ менә “Милли” ресторанын сайладың?

- Шәһәрнең иң затлы рестораннарын гына карадым. Интерьерның да, күренешнең дә матур булуы мөһим иде. “Милли” рестораны барлык таләпләремә дә туры килде. Өстәвенә биредә хәләл ризык. 

- Мәҗлес ничә сумга төште?

- Бик кыйммәткә төште, бәясен әйтеп тормыйм. Фотозона, алып баручы, кавер төркеме, ресторан арендасы, кухня – барысы да кыйммәт булды. Иремә рәхмәт, бөтен чыгымнарны үзе түләде.  

- Ни өчен туган көндә кызың Сәфинә юк иде?

- Без иптәш кызларым белән балаларны алып килмәскә дип сөйләштек. Салават белән Гүзәлем Миңнехановларның кызы Мәдинә генә булды.

- Мәҗлеснең программасы юк иде бугай?

- Әйе. Туган көн язып куелган программа буенча бармады. Тулысынча импровизация булды. Моның бөтен кызыгы да шунда иде. Теләгән һәркем чыгып җырлый алды. Мәҗлесне Руслан Шәрәфетдинов алып барды. “Австралия” кавер төркеме чыгыш ясады. Мин бик канәгать калдым. Аллаһы боерса, мондый рухтагы кичәләрне киләчәктә дә оештырачакмын.

- Чәчәкләрне ничек алып кайттыгыз?

- Мин ул чәчәкләрдән шокта идем. Аларның барысы да шулкадәр затлы. Зал чәчәкләр белән тулды. Өем хуш искә күмелде.

- Нинди бүләкләр бирделәр?

- “Теләгән әйбереңне үзең алырсың” дип күбесе акчалата бүләк бирде. Сертификатлар да булды.

- Тагын бер кат туган көнең белән, Дилә!