#Шоу-бизнес 04 января 2021, 11:38 Уку өчен 3 минут

Гөлназ Миньязова: "Миңа һәрвакыт әниемнең игътибары җитмәде"

04 января 2021, 11:38

Уку өчен 3 минут

“Болгар радиосы” алып баручысы Гөлназ Миньязова Инстаграм сәхифәсендә үзе турында кызыклы 10 факт язды. "Кайберләрен хәтта якыннарым да белми", - ди ул.

Скопировать ссылку

Гөлназ Миньязова: "Миңа һәрвакыт әниемнең игътибары җитмәде"

1. Балачакта төймәләр белән уйнарга яраттым. Төсләрне бүлеп, кушып уйнадым. Хәзер бу шөгыльнең вак моториканы (баш миен) үстерүен яхшы аңлыйм.

2. Миңа һәрвакыт әниемнең игътибары җитмәде. Бервакыт туганнар белән дәү әни янына баргач, бөтен кешенең игътибары миндә булсын өчен юри эчем авырта дидем.

3. Күршегә шәһәрдән кунак кызы кайта иде. Бервакыт миңа йөзеген сатып бирергә булды. Күбәләк кебек матур йөзек. Бер сум акча җитмәде. Ул вакытта ипи 3 сум тора иде. Мин әнидән рөхсәт сорамыйча, аның янчыгыннан акча алдым. Күп еллар узгач кына бу хакта әнигә сөйләдем.

4. Малайлар белән сугыша идем.

5. Матур заманча чанам булмады. Барысы да апалардан кала иде. Чормада реактив моторлы, оча торган чанам бар дип, дус кызларымны алдый идем. Янәсе, аны көндез күрсәтергә ярамый, шуңа күрә төнлә генә очам. Иптәш кызым ышана иде.

6. Мәктәп подвалында (мәктәп зур, ике катлы) төрле яктан керү-чыгу юлы бар. Дәресләрдән соң, подвалга төшеп, үземне дөньяны коткаручы шпион дип күзаллап, төрле якка чабып йөри идем. Лара Крофт, диярсең...

7. 10 сыйныфка кадәр тәнемдә кырырлык чәч бөртеге булмады. Моннан оялып, чәч бөртеге тизрәк үссен дип, култык астын кыра идем.

8. 1994 елның июлендә күремем башланды. Кан күргәч, кычкырып җибәрдем. Ишегалдына әни йөгереп чыкты. Мин елыйм. Ул миңа балачагым белән хушлашуым, малайлар белән сугышырга да, дуслашырга да ярамавын, алайса балага узарга мөмкин булуымны әйтте.

9. Дус кыз белән уйнаганда, мин һәрвакыт “әти” ролен уйнадым.

10. Табиб уенчыкларын ярата идем. Без кечкенә вакытта медицина җиһазлары җыелмасы кечкенә иде. Анда хуш исле сабын, линзасыз сары күзлек, шприц һәм стетоскоп бар иде.