Идрис Газиев: «Кайгылы хәбәр күңелемне төшерде»

- Идрис абый, хәлләрегез ничек? Соңгы арада сәхнәдә сирәк күренәсез...
- Хәлләрем яхшы, Аллага шөкер. Минем төп эшем - Уфа дәүләт сәнгать академиясендә, студентлар белән шөгыльләнәм. Бу атнаны җәйге сессия тәмамлана, аннары - июль, кабул итү комиссиясендә утырачакмын. Җәйне ял итеп кенә уздырып булмый. Августта гыйльми эшләр белән шөгыльләнермен дип уйлыйм. Татар музыкаль әдәбияты өлкәсендә эзләнүләр алып барам. Моның өчен берничә көнгә Казанга да барып кайтасы булачак.

- Сәнгать өлкәсендәге укыту эшендә акча берәр нәрсә хәл итә аламы?
- Шәхсән мин бюджетта укыган талантлар белән эшлим. Сүз дә юк, кайберләренә күбрәк көч салырга туры килә, сөйрәбрәк алып барасың. Әмма аларда тырышлык һәм фанатизм күрәсең икән, димәк, киләчәкләре якты. Укытучыда да омтылыш булырга тиеш. Ансыз ул укыта да алмый. Укыту эшендә акча өчен түгел, ә ярдәм итү максатыннан эшлисең. Бернинди ялсыз, бирелеп... Укучы һәм укытучының тырышлыгы туры килгән очракта гына якты киләчәккә зур адымнар ясала.

- Еллар үтү белән популярлыгыгыз төшүе сизеләме? Бу күңелегезне кырмыймы?
- Мин бар әйбергә дә реаль күзлектән карыйм. Сүз дә юк, сәхнә яшьлекне ярата. Концерт эшчәнлегем сүлпәнәйде, әмма үземне төшеп калганнардан санамыйм. Укыту эшендә үземне таптым, эшемне яратып башкарам һәм шуңа күрә күңелем тыныч.

40 елдан артык җырлаган кеше буларак, популярлык - ул бүген бар, ә иртәгә - юк, икәнен яхшы беләм. Вакытында үз тамашачымны тупладым, бүген дә алар миңа тугры булып калдылар. Репертуарым белән мактана алам. Әле дә яшь җырчылар шалтыратып: "Идрис абый, шул елларда башкарган шул җырыгызны алып, яңа аранжировка ясап, җырласам ярыймы?" - дип шалтыраталар. Әлбәттә, ярый. Монда бернинди дә тыю юк, хуплыйм гына. Мин гомер буе профессиональлек турында сүз алып бардым, җырга җитди караш булырга тиеш. Ә яшь җырчыларга минем репертуар ошый икән, димәк алар дөрес юлда.

- Үз эшенең остасы буларак, яшь җырчылардан кемнәрне билгеләп китәр идегез?
- Өметле яшьләр бик күп. Раяз Фасыйховның репертуары җитди. Ул тыңгысыз, һәрвакыт эзләнүдә. Халык җырлары булсынмы, заманча эстрадамы, ритмлы җырлармы - барысын да югары дәрәҗәдә башкара. Филүс Каһиров бик булдыра. Ул бик җитди юнәлештә эш алып бара. Аллага шөкер, андыйлар эстрадабызда бик күп.

- Соңгы арада күңелегезне төшергән хәл-вакыйга?
- Әлфия апа Авзалованың безнең арабыздан китеп баруы. Ул чын дәрәҗәсендә эстрада җырчысы иде. Аны искә алып, барлык фотографияләрен, видеодан чыгышларын карап утырдым. Сокланмый мөмкин түгел! Матур тембры, күкрәктән чыккан моңлы тавышы һәм чын күңеленнән бирелеп җырлавы белән калганнардан аерылып торды ул. Аның белән бер чорда яшәвем, эшләвем белән горурланам. Бу кайгылы хәбәр күңелемне чынлап та төшерде.