Рифат Фәттахов: "Концертларда инфекция таралуга юл куя алмыйбыз"

“Концертларның күчерелүе коронавирус аркасында килеп чыккан вәзгыятьнең кискенләшүе белән бәйле. Әйе, концертларны күчерү матди яктан зур зыян сала. Ләкин без концертларда инфекция таралуга юл куя алмыйбыз. Тамашачыбызның сәламәтлеге – иң мөһиме! Шулай ук артистларыбызның иминлеген дә кайгыртырга бурычлы без”, - ди Рифат Фәттахов.

Шулай итеп, “Микрофонсыз концерт” тамашасы март аена, “Яңа татар җыры”ның гала концерты февральгә күчерелгән. Моннан тыш, Гөлсирин Абдуллина, Азат Абитов, Рәнис Габбазов һәм Зәлилә катнашындагы концертлар төбәкләрдә булмаячак. 2021 елдан бу төбәкләрдә “4-әү” дип исемләнгән яңа программа тәкъдим ителер дип көтелә.