Сабан туе-2023: кайсы артист кайда җырлаячак?

Шәхсән безнең авыл (Мамадыш районы, Югары Кыерлы авылы-авт.) Сабан туена ел да иң популяр, танылган артистлар килә. Аларны күрү өчен авылыбызга әллә кайсы шәһәр-районнардан килеп төшәләр. Быел да менә Илсөя Бәдретдинова киләчәк, ди... 

Артистлар Сабан туе графикларын интернетка куя башлады инде. Гүзәл Уразова 10 июньдә - иртән Буа районы Яңа Тинчәле авылында, көндез Теләче районында, 11 июньдә – Тукай районы Кызыл Байрак авылында, 12 июньдә – Актаныш районы Яңа Әлем районында чыгыш ясарга җыена. Илсөя Бәдретдинова 9 июньдә – Балтач районында, 10 июньдә – Биектауда, 11 июньдә – Яшел Үзәндә, 17 июньдә – Чаллыда, 18 июньдә – Барда районында, 8 июльдә – Мамадыш районы Югары Кыерлы авылында узачак Сабан туенда җырлаячак. Зәйнәб Фәрхетдинова 10 июньдә – Минзәләдә, Әгерҗе районы Кырындык авылында, 11 июньдә – Саба районы Явлаштау авылында булыр дип көтелә.

Филүс Каһиров 9 июньдә – Актаныш районы Меңнәр авылы, 10 июньдә – Мөслим районы Елгабаш авылы, кичен Зәй районы Р.Ш.Фәрдиев паркы, 11 июньдә – Алабуга ипподромы, кич белән Менделеевскида, 18 июньдә – Түбән Камада булачак. Зинира һәм Ризат Рамазановлар 10 июньдә – Актаныш районы Чөгәнә авылы, 11 июньдә – Нурлат районы, 12 июньдә – Башкортстанның Илеш районы Шәммәт авылы, 18 июньдә – Түбән Кама халкы өчен чыгыш ясаячак. Ришат Төхвәтуллин 10 июньдә Бөгелмә һәм Чистай, 11 июньдә Апас халкын моңлы тавышы, матур җырлары белән сөендерәчәк. Ришатны 24 июньдә Казан Сабан туенда да (Аккош күлендә) күреп булачак. Рифат Зарипов 10 июньдә – Питрәч районында, кичен Биектауда, 11 июньдә – Балтач районы Алан авылында узачак Сабан туенда җырлар дип көтелә.

Алинә Сафиуллина 10 июньдә – Саба районы, Ядегәр авылы, кич белән Куян авылы, 11 июньдә – Саба районы Иске Мичән һәм Тимершык авыллары Сабан туенда катнаша. Айгөл Бариеваны 10 июньдә – Тукай районы Иштирәк авылы, 11 июньдә – Саба районы Иләбәр авылында гөрләячәк Сабан туйларында күреп булачак. Гүзәл һәм Илназ Баһлар 10 июньдә – Арча районы Шушмабаш авылы, 11 июньдә - Саба районы Сатыш авылы Сабан туенда җырлаячак. Лилия Муллагалиева 10 июньдә – Яшел Үзән районы Күгеш авылы, 11 июньдә – Сарман районы Кәүҗияк авылы, Тукай районы Кызыл Байрак авылында чыгыш ясый. Рәфинә Ганиуллина белән Рәзил Камалов 10 июньдә – Мамадыш һәм Балтачта, 11 июньдә – Теләче районы Иске Җөри авылында, 17 июньдә – Биектау районы Дөбъяз авылында һәм Чаллыда, 24 июньдә – Яшел Үзән районы Бәчек авылында, Биектау районы Олы Солабаш авылында җырлаячак.