Быел “Татар җыры”ның 2021 елга күчерелүе турында төрле имеш-мимешләр йөри. Оештыручылар моны пандемия белән бәйләсә, кемдер билетларның сатылмавына сылтаган. “Барс-Рекордс” ҖЧҖнең үсеш һәм инновацияләр буенча директоры Динә Гәрәева гайбәтләргә нокта куйды.
“Беренчедән, вәзгыять, чынлап та, катлаулы, вирус йоктыручылар саны арта бара. Икенчедән, безнең команданың географиясе киң, Россиянең төрле төбәкләрендә һәм хәтта чит илдә яшәүче партнерларыбыз бар. Әлеге чараның уңай һәм тискәре якларын үлчәп, “Татар җыры”н үткәрмәскә дигән карарга килдек”, - ди ул.
Бу карарны кабул итү җиңел булмаган. “20 ел дәвамында үткәрелгән “Татар җыры”н киләсе елга күчерү авыр булды. Әйе, без аны “ТМТВ” премиясен тапшыру тантанасын оештырган кебек онлайн режимда үткәрә ала идек. Ул чакта тантананы үз өстебезгә зур җаваплылык алып, онлайн форматта булса да оештырдык. Тик “Татар җыры” - төрле җирдә яшәүче татарларны берләштерүче зур мәйдан. “Татар җыры” - ул үзе бер тормыш. Аны онлайн форматта үткәрү мөмкин түгел”, - ди Динә Гәрәева.
Ул билетлар сатылуга бәйле сорауга да җавап бирде. “Бүгенге вәзгыятьне истә тотканда, билетлар ярыйсы гына сатылды. Залны 70 проценттан да артык тутырырга ярамау сәбәпле, билет сату белән бәйле кыенлыклар булмады. Ә инде явыз теллеләр безнең турында сөйли икән, сөйләсеннәр. Димәк, без эшлибез, димәк, безнең белән кызыксыналар”, - диде Динә Гәрәева.
Аның сүзләренчә, пандемия чорында “Барс Медиа” артистларга ярдәм күрсәткән. “Бу дөнья кыйммәтләре акчага гына корылмаган. Кайвакыт якыннар да авырый. Төрле хәлләр булырга мөмкин”, - ди Динә.
Эльвира ШАКИРОВА
Иң мөһим һәм кызыклы язмаларны Татмедиа Telegram-каналында укыгыз
