#Сорау-җавап 03 мая 2018, 10:12

Бала дәваланган өчен тотылган акчадан салымны әти-әнисе 18 яшьтән соң да кайтара аламы?

03 мая 2018, 10:12

Кызымның күзенә операция ясаттык. Дәвалану өчен акчаны үзем түләдем. Кызым медицина көллиятендә укый, эшләми. Дәвалану өчен тотылган акчадан 13 процент салымны кайтарыйм дип документлар җыеп тапшырган идем, кызыгызга 18 яшь тулганнан соң, бу мөмкин түгел, диделәр.

Скопировать ссылку

Салым кайтаруда яшь чикләве бармыни? Без берничек тә ул акчаларны кайтара алмыйбызмы?

Алинә Хәкимуллина, Арча.

Халыкка ярдәм итү максатыннан, дәүләт сәламәтлекне яхшырту өчен тотылган акчаларның 13 процентын кире кайтару мөмкинлеген бирә. Дөрес, һәр дәвалану төре өчен салым чигерүе каралмаган. Медицина учреждениеләре салым инспекциясе өчен номер һәм штамп сугылган билгеле бер үрнәктәге белешмә бирә. Анда 13 процентын кайтарып була торган медицина хезмәтләре генә күрсәтелә.Бер елга бары 120000 сумнан гына салым кайтарырга була. Дөрес, дәвалануга килгәндә, Россия хөкүмәте тарафыннан расланган исемлеккә кергән кыйммәтле медицина хезмәтләренә тотылган чыгымнарга социаль салым чигерү күләме чикләнмәгән. Ә менә бу өлкәдә салым кайтарганда, яшь буенча чикләүләр каралган. Бала дәваланган өчен тотылган акчадан салымны әти-әнисе сабыена бары 18 яшь тулганчы гына алырга хокуклы.Татарстан буенча федераль салым хезмәте идарәсе аңлатуынча, сезнең очракта чынлап та операция, дәвалану өчен тотылган акчаның 13 процентын кайтару мөмкин түгел. Дөрес, хастаханәгә мөрәҗәгать итеп, документларны кызыгыз исеменә күчертүне сорарга мөмкин. Әмма бу вакытта салымны кызыгыз бары эшләгән очракта гына кайтара ала.

Кызыклы яңалыкларны күзәтеп бару өчен Телеграм-каналга кушылыгыз.