#Сорау-җавап 27 апрель 2026, 09:39

Күгәрченнәр ашаткан өчен штраф

27 апрель 2026, 09:39

Без шәһәрдә яшибез. Ишегалдында күгәрченнәрне ашатам. Соңгы вакытта моның өчен штраф салырга мөмкин диләр. Бу дөресме? Самат, Буа.

Скопировать ссылку

– Кайбер очракларда күгәрченнәрне ашаткан өчен дә административ җаваплылыкка тартырга мөмкиннәр. Ишегалларында һәм балалар мәйданчыкларында кошларның күпләп җыелуы территориянең пычрануына китерә. Бу санитар-эпидемиологик нормаларны һәм төзекләндерү кагыйдәләрен бозу дип бәяләнергә мөмкин.

Калдырылган азык һәм чүп “рөхсәтсез чүп ташлау” дип танылса:
— беренче тапкырда 3 мең сумга кадәр штраф;
— кабатланган очракта 5 мең сумга кадәр штраф каралган.

Моннан тыш, әгәр кошлар аркасында милеккә зыян килсә (мәсәлән, машина буявы бозылса яки бинаның фасады пычранса), җаваплылык тагын да катгыйрак булырга мөмкин. Бу очракта төбәк законнары кулланыла.

Күгәрченнәрне ашату тыелмаган, әмма кагыйдәләрне үтәргә кирәк. Белгечләр киңәш итә: кошлар өчен махсус җимлекләр куллану — иң куркынычсыз һәм законлы юл.

Кызыклы яңалыкларны күзәтеп бару өчен безнең МАХ каналына кушылыгыз.