Безнең Кама Тамагы районы, Олы Карамалы авылында 94ләп кенә кеше яши. Кибет юк. Автолавка гына килеп китә. Бу юлы ул 94 кешегә өч кенә буханка ипи китергән иде. Халык аптырашта. Үзизоляция вакытында район үзәгенә кертмиләр. Аннары өлкән яшьтәгеләрнең смс рөхсәт алырга мөмкинлеге дә юк. Исемем редакция өчен генә.
Кама Тамагы районы, Олы Карамалы авылы җирлеге башлыгы Эдуард Байдамшин әйтүенчә, автолавка алар авылына атнага өч тапкыр: сишәмбе, пәнҗешәмбе, җомга көннәрендә килә икән. Берсендә чынлап та, Олы Карамалыга килеп җиткәнче, өч кенә буханка ипи калган булган. Чөнки кибетчеләр ипине җитәрлек күләмдә алмаган, башка авылларда сатып алучылар күбрәк булган.
– Бу мәсьәлә буенча кисәтү ясалды, алга таба авыл халкы ипи белән җитәрлек күләмдә тәэмин ителер дип уйлыйбыз, – диде Эдуард Байдамшин.
Иң мөһим һәм кызыклы язмаларны Татмедиа Telegram-каналында укыгыз
