Шәһри Казан

“Путин акчасы” төрле балага төрлечә түләнә

Мин алты бала анасы. Моңа кадәр дәүләттән 5225 сум пособие алып бардым. Тик “Путин акчасы” бирелә башлагач, ул пособиене туктаттылар. Имеш, керемебез яшәү минимумыннан артып киткән. Ул хәзер ничә сумны тәшкил итә соң? Биш балага тәрбиячесен югалтучы буенча пособие алам. Ни өчен ул һәр балага төрле икән? Ачыклык кертсәгез иде. Лилия Туктыева, Тукай районы, Биклән авылы.

Тукай районы социаль яклау бүлеге хезмәткәрләре аңлатуынча, Туктыева социаль яклау бүлеге белән социаль килешү төзегән булган. Шуңа да аңа ярдәм йөзеннән пособие түләнеп барган. Тик гаиләнең кереме бер кеше башына яшәү минимумыннанан артып киткәч, ул акчаны туктатканнар. Керем исә былтыр Россия Президенты балаларга биргән пособиеләр хисабына арткан. Хезмәткәрләр әйтүенчә, Тукай районында бер кешегә яшәү минимумы 9752 сумны тәшкил итә.
Тәрбиячесен югалтучы буенча пенсия күләменә килгәндә, ул чынлап та төрле балага төрлечә булырга мөмкин. Чаллы шәһәре пенсия бүлегенең Тукай районы клиент хезмәте белгечләре аңлатуынча, бу берничә факторга бәйле. Әгәр баланың физик мөмкинлекләре чикле икән, ул инвалидлык буенча пенсия ала. Тәрбиячесен югалтучы буенча пенсия күләме мәрхүмнең стажына, пенсия күләменә дә бәйле. Ул акча тәрбияченең иждевениедә булган балаларына тигез итеп бүленә. Әгәр балаларның әтиләре төрле икән, димәк, пенсия күләме дә төрле дигән сүз. Кайбер очракта, тәрбияченең стажы булмау аркасында, иждевениедә булган балаларга социаль пенсия билгеләнә. Ул якынча 5 мең сум тирәсе. Федераль түләүләр ярдәмендә, ул акчаны яшәү минимумы дәрәҗәсенә җиткерәләр. Бу очракта пенсионерлар өчен каралган яшәү минимумы исәпкә алына. Быел ул ниһаять артты, һәм 8432 сумны тәшкил итә.
Лилия ханым, сорауларыгыз булса, Тукай районы клиент хезмәтенә мөрәҗәгать итә аласыз. Анда сезгә барысын да җентекләп аңлатачакбыз, диделәр.

 

Реклама

 

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: