#Сорау-җавап 02 февраля 2018, 10:06

Табибка ничек язылырга?

02 февраля 2018, 10:06

Баланы участок педиатрына алып килгән идем, су буе чират, интернет аша язылганнарны гына кабул итәләр, диделәр. Компьютеры булмаган кешегә нишләргә соң? Бөтен кеше интернет аша языла алмый бит. Үзем, мәсәлән, ничә тапкыр талпындым, языла алмадым. Кайда теркәләсен дә белмим, кайсы төймәгә басарга кирәклеген дә аңламыйм. Элек табибка чиратлаштырып кертәләр иде. Алдан язылмаганнар аз түгел. Аннары, бала кинәт авырып киткәндә, компьютер кайгысымыни? Интернет аша участок педиатрына ничек язылырга икәнен аңлатыгыз әле. Әлфия Гарипова, Казан.

Скопировать ссылку

Интернет аша участок педиатрына язылу өчен, беренче чиратта, www.uslugi.tatar.ru сайтында шәхси кабинетыңны булдырырга кирәк. Аннары «Сәламәтлек: табибка язылу, файдалы мәгълүмат алу» бүлегенә кереп, «приемга язылырга» дигән төймәгә басасың. Шуннан соң «Татарстан медицина учреждениесендәге табибка язылу» төймәсен сайлап, килешүне укып чыгарга кирәк. Монда сервистан файдалану кагыйдәләре аңлатылган. Барлык таләпләр белән дә килешсәгез, персональ мәгълүматларны эшкәртүгә ризалык бирәсез һәм ОМС полисын сайлыйсыз. «Участок терапевтына язылырга» төймәсе ярдәмендә үз сырхауханәгезне табасыз, үзегезгә кирәкле педиатрны, кабул итү көнен, сәгатен сайлыйсыз. Табибларга язылу турында тулырак мәгълүматны сырхауханәдәге регистратура хезмәткәрләреннән сорарга була. Ә балагыз кинәт авырып киткәндә, алдан язылмыйча да, табибларга мөрәҗәгать итәргә була. Мондый очракларда сырхауханәләрдә махсус бокс бүлмәләре, кизү торучы табиблар каралган.