4 мең гаилә көткән яңалык: социаль ипотека программасында катнашучылар да ана капиталын куллана алачак

Татарстан Президенты каршындагы Дәүләт торак фонды башкарма директоры урынбасары Булат Гыйльманов сүзләренчә, ана капиталын балалары өч яшькә җиткән гаиләләр куллана ала.
– Проблемалы, авыр сорау иде бу. Аны хәл итү өчен шактый көрәшергә туры килде. Моның өчен без Татарстан Президенты Рөстәм Миңнехановка, республиканың Төзелеш министрлыгы һәм Россия Пенсия фондының Татарстан бүлегенә рәхмәтләребезне җиткерәбез. Бу эштә алар активлык күрсәтте һәм үзара килешеп эшләвебез нәтиҗәсендә социаль ипотека программасында катнашучылар ана капиталы акчасын янәдән куллана алачак, – дип белдерде ул матбугат очрашуында.

Әлеге мөмкинлектән файдалану өчен дәүләт торак фондның вәкиллегенә мөрәҗәгать итәргә кирәк. Гариза тапшырылганнан соң, фонд хезмәткәрләре документларны әзерли. Билгеле бер вакыттан соң кабат килеп, инде әзер документны аласы һәм шуны Пенсия фондына илтеп тапшырасы була. Ана капиталын якынча өч айга кадәр күчерәчәкләр. 
– Гражданнарны 15-20 июль көннәрендә кабул итә башларбыз дип торабыз, бу хакта социаль челтәрләрдә һәм шәхси кабинетта игълан итәчәкбез, – диде спикер.

Ана капиталын кулланучыларның 80 проценттан артыгы аны торак шартларын яхшыртуга тота. Бу хакта журналистларга Россия Пенсия фонды Татарстан бүлегенең түләүләр һәм социаль түләүләр идарәсе башлыгы Ирек Хәбибуллин хәбәр итте. 
– Ана капиталын файдалану өчен халыктан өстәмә белешмәләр җыю таләп ителмәячәк. Гариза тапшырылганнан соң, акчалар “Строим будущее” торак кооперативына кимендә ун көн эчендә барып җитәчәк. Белешмәләр өчен Пенсия фондының 8 800 600 00 00 телефон номерына шалтыра аласыз, – диде ул. 
Белгәнегезчә, социаль ипотека программасы белән торак алган гаиләләргә республика тарафыннан һәр бала өчен 200 мең сум дәүләт ярдәме бирелә. Бу ярдәм күләме унбиш ел элек тә шулай иде. Киләчәктә бу сумманың күләме артмасмы дигән сорауга Булат Гыйльманов, әлегә андый мөмкинлек юк, дип белдерде. 
– Бюджет кагыйдәләре белән бәйле ул. Аның үз лимиты бар. Без бу сорауны бер-ике тапкыр күтәреп тә чыккан идек. Әлегә шул күләме генә кала. Бездән тора торган мәсьәлә түгел, – диде торак фонды башкарма директоры урынбасары. 

Социаль ипотека программасында катнашкан 19 мең гаилә ана капиталын файдаланган. Бу 7,5 миллиард сум дигән сүз.   

Исегезгә төшерәбез, Россия Хөкүмәте карары үзгәрүгә бәйле рәвештә, 2021 ел башында ана капиталы акчаларын социаль ипотека килешүләренә күчерү туктатылды. Үзгәреш йорт салынган җир кишәрлеге торак кооперативының милке булырга тиешлеген күздә тота иде.