Авылда яшәүче 35 яшькә кадәрге бала тапкан хатын-кызларга 100 мең бирергә мөмкиннәр

Татарстан Фәннәр академиясенең Гаилә һәм демография үзәге директоры Чулпан Илдарханова сүзләренчә, бүген республикада 4 миллион да 5 мең кеше яши һәм бу иң зур күрсәткеч. 
– Татарстанда моның кадәр кеше беркайчан да яшәмәгән. Әмма бу демографик мирасны саклап калып булырмы? Шул ук вакытта демографик вазгыятьне туучылар санын арттыру юлы белән генә яхшыртып булмый. Ни өчен дигәндә, 1990 еллардагы “демографик чокыр” буыны үсеп җитте, – диде спикер. 

2018 елдан республикада авыл җирендә яшәүче хатын-кызларга күрсәтелә торган ярдәм чараларының нәтиҗәлелегенә дә анализ ясады. Белгәнегезчә, беренче баласы тугач, 25 яшькә кадәрге хатын-кызларга – 50 мең сум, ә 29 яшенә чаклы өченче баласын тапканнарга 100 мең сум акча бирелә. 
– 19 яшькә кадәрге төркемгә бу чаралар йогынты ясамаган, туучылар саны монда өч тапкырга кимегән. 20-24 яшь төркемендә кимүне туктатып булды. 25-29 яшь төркемендә үсеш тенденциясе күзәтелә. Тагын бер факт – әниләрнең уртача яше – 29. Бу саннарга караганда, әниләр яшәрмәде. Шуның белән туулар календаре авышты, – диде Чулпан Илдарханова.

«Мәрхәмәт-Милосердие» хатын-кыз депутатлар берләшмәсе җитәкчесе Алсу Нәбиева үзенең чыгышында аграр яшьләрнең мөрәҗәгате белән таныштырды. 
– Авылда яшәүче яшьләр өчен бала тапкан очракта бирелә торган ярдәмнең 29 яшькә кадәрге хатын-кызларга бирелүен һәм бу күрсәткечне, яшьләр турындагы закондагыча, 35 яшькә кадәр күтәрергә сорыйлар, – диде ул. 

Әлеге социаль ярдәм чарасының игътибарга лаек булуына да басым ясады депутат. 2018 елдан бирле республика авылларында 8,8 меңнән артык бала туган, беренче бала туганда түләүләр саны 6 процентка, өченчесе 27 проценткка арткан. Әлеге максатларга республика бюджетыннан 518,8 миллион сум акча тотылган. Татарстан буенча тулаем алганда, өченче һәм аннан соңгы балаларның туу өлеше бу вакыт эчендә 3,5 процентка үскән, 2021 ел нәтиҗәләре буенча 24,8 процентны тәшкил итә.