Шәһри Казан

Мәгариф министры халыкны кабул итте

Татарстанның мәгариф министры Энгель Фәттахов «Бердәм Россия» төбәк иҗтимагый кабул итү бүлмәсендә мәгариф өлкәсенә кагылышлы мөрәҗәгатьләре булган кешеләр белән очрашты. Министр белән очрашуга сигез кеше килгән иде.

Әлки районы Түбән Кәчи авылы мәктәбе директоры Ирина Краснова мәктәпкә ремонт ясау үтенече белән мөрәҗәгать итте. Бүген мәктәптә 35 бала белем ала икән. Мәктәп түбәсенә ремонт ясарга кирәк. Ата-аналар бинада тынчу, суларга һава юк дип зарлана ди.

- Без инде үз көчебез белән ремонт ясап карадык, ләкин ул ярдәм итмәде. Мәктәпкә капиталь ремонт кирәк. Шуңа күрә сезгә мөрәҗәгать итәргә булдык, - диде директор.

Энгель Фәттахов бу мәсьәләне Әлки районы хакимияте белән бергәләп хәл итәргә вәгъдә бирде.

- Мәктәпләргә капиталь ремонт ясау буенча биш еллык программа эшли. Программа әле башланып кына киткән чорда ремонтка мохтаҗ 787 мәктәп исемлеге төзелгән иде.

Хәзер инде эшнең күбесе үтәлгән, нигездә, безнең кечкенә мәктәпләр калды, - диде мәгариф министры.

Казанныж Кулагин урамында урнашкан 114нче мәктәптә тарих фәннәре укыткан Кадрия Нигъмәтуллина да мәктәпне яңарту буенча янып йөри.

- Мин монда укытучы буларак кына түгел, ә ана буларак та килдем. Улым да шушы мәктәптә белем ала. Мәктәбебез иске, урын җитми, балалар икешәр сменага бүленеп укый.

Шушы мәктәп урынына яңа бина яки янкорма төзеп булмас микән? - дип сорады ул министрдан.

Реклама

Энгель Фәттахов исә бу мәсьәлә буенча шушы көннәрдә үк җаваплы кешеләр белән очрашып сөйләшәчәген белдерде.

Казанның Авиатөзелеш районында яшәүче Ангелина Федотова 407нче балалар бакчасында барган ремонт эшләре буенча борчылып килгән. Баласы әле күптән түгел генә бу бакчага күченгән. Хәзер, ремонт сәбәпле, тагын яңа садикка күченергә кушалар икән.

- Бала яңа мохиткә ияләнеп, әле генә елавыннан туктады, хәзер тагын башка җиргә күчерәләр. Бу яшьтә балаларның психикасы бик сизгер бит. Яңа иптәшләренә дә ияләнәселәре бар, - дип зарланды әни кеше.

Министр бу бакчадагы балаларны, ике зур төркемгә аерып, вакытлыча башка балалар бакчасына урнаштырачакларын әйтте. Бу очракта балалар дус-ишләреннән дә аерылмаячаклар.

- Әлбәттә, бүген монда яңгыраган сораулар район дәрәҗәсендә хәл ителергә тиеш, ләкин без бер эш башкарабыз. Шуңа да бу синеке, монысы минеке дип карамыйбыз, - диде министр соңыннан мөрәҗәгатьләр турында. - Район хакимияте башлыклары белән тыгыз элемтәдә торабыз. Бүген Татарстан күп кенә өлкәләрдә лидер. Әгәр дә без кадрлар әзерләүне хәзерге этапта башламасак, мәгариф системасын үзгәртмәсәк, тормышка җавап бирерлек балалар әзерләмәсәк, бу кайчанда булса безнең республиканы артка өстерәячәк.

Энгель Фәттахов сүзләренчә, иң күп мөрәҗәгатьләр бакчаларда балаларга урын җитмәү белән бәйле икән. Мәктәпкәчә балаларга белем бирүне яхшырту өчен, 2015 елда, сынау проект буларак, Казан, Түбән Кама, Балык Бистәсе, Алексеевск һәм Югары Ослан районнарында ун балалар бакчасына ремонт ясалачак. Ә 2016 елда инде балалар бакчаларына капиталь ремонт ясау программасы эшли башларга тиеш.

Фото www.business-gazeta.ru сайтыннан алынды

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: