#Социаль тормыш 20 апреля 2022, 12:51

Мондый бәяләр безне бизәми

20 апреля 2022, 12:51

Владимир Путин ил халкы ачтан үлмәсен өчен, халыкны очсыз һәм сыйфатлы товарлар белән тәэмин итәргә йөкләмә биргән иде. Шул бурычларны истә тотып, ил Хөкүмәте Россия калаларында күпләп сата торган базарлар системасын булдырырга карар кылган.

Скопировать ссылку

Беренчедән, бу авыл хуҗалыгы товарлары җитештерүчеләргә сату мәйданы булса, икенче яктан халыкка файда. Күпләп сату белән бергә, мондый базарларда ваклап сату да булачак.

Татарстан Путин фәрманын көтеп тормады, инде ничә ел рәттән язын һәм көзен зур калаларда һәр шимбә ярминкәләр оештыра. Ул ярминкәләргә килүнең кыенлыкларын авыл халкы үзе генә белә, әлбәттә. Иртә торып юлга чыгу турында сүз бармый монда. Эшмәкәрләрнең ярминәгә җыенуның үз “серләре” бар. Аларны туплап, җыеп килергә тиешле районның авыл хуҗалыгы һәм азык-төлек идарәсе җитәкчеләренең дә башына төшкән тимер тарак инде ул. Үстергән ризыгыңны арзанга сату да күңелне күтәрми. Әмма ризык базыңда череп ятса да берни эшләтә алмыйсың. Шуңа да авыл халкы авырсынып булса да калага сатарга килә. Башка чара юк. Авыл гомер буе шәһәрне ашаткан дигән сүз юктан гына чыкмаган бит инде...

Ул күпләп сату базарларында да ярминкә принцибы эшләмәсен иде инде. Ни дисәң дә, авыл халкының да хезмәтен аз булса да хөрмәт итәргә кирәк. Кайберәүләр сатучы янына килә дә: “Ай кыйммәткә сатасыз”, – ди. Үзе үстерсә, ике тапкыр артыгракка сатар иде әле ул алучы.

Элек авыл хуҗалыгы һәм азык-төлек министры булган, хәзер Татарстанның Дәүләт Советы рәисе урынбасары вазифасын башкаручы Марат Әхмәтов фикеренчә, республика үзен яшелчәләр белән туендыра алсын өчен берәр махсус программа булдырырга кирәк.
– Яшелчәлек һәм бәрәңге җитештерү проблемасына кискен карарга кирәк. Алдагы ике-өч елда технология ягыннан, җитештерү, бәрәңгене һәм яшелчәләрне саклау юнәлешендә ниндидер үсеш булсын өчен бәлки якын киләчәктә программа булдырырга кирәктер? Бәрәңгенең килосы 50 сум булмаска тиеш... Безнең климатик зонада яшелчәләр өчен мондый бәяләр булу безне бер дә бизәми”, – диде Марат Әхмәтов.

Татарстан икътисад министрының беренче урынбасары Олег Пелевин билгеләп үткәнчә, бәяләрне алар көн саен контрольдә тота икән. (Кәбестәнең бәясе 170 сумга менгән атнада гына контроль йомшарып киткән булган, ахры).
– Товар бәяләре – безнең өчен өстен мәсьәләләрнең берсе. Хәзер төп бурыч – кибет киштәләрендә барлык товарларның да булуын тәэмин итү. Әйе, ил күләмендә бәяләрнең үсүен күрәбез. Тагын бер бурычыбыз – бәяләр белән спекуляцияләрне булдырмау. Бу юнәлештә дә Монополиягә каршы федераль идарә хезмәте һәм хокук саклау органнары эш алып бара, – диде Пелевин.