Бәйрәмгә бүләк: 9 мөмкинлектән - 8 чемпион!

Ижау шәһәрендә олимпия төрләренә кермәгән һәм милли спорт төрләре буенча VIнчы бөтенроссия фестивале узды. Әлеге чарада көрәш буенча Татарстан командасы да чыгыш ясады һәм уңышка иреште. Бу хакта безгә Татарстан көрәш федерациясе башкарма директоры Равил Хәйруллин сөйләде.

Ижау шәһәренә Татарстан командасы тулы составта барган. Татарстаннан вәкиле - Айрат Гатауллин, команда җитәкчесе - Равил Хәйруллин, баш тренер - Җәүдәт Хөсәенов һәм тугыз көрәшче. Составка рәсми ярышларда әлегә зур уңышларга ирешмәгән, ләкин пьедесталга якын килүче танылып килүче көрәшчеләрне алганнар. Иң тәҗрибәле көрәшче - Алмаз Миннехуҗин. Алмазны Җәүдәт Хөсәенов җитәкчелегендә Идел буе командасы өчен чыгыш ясаган вакытын хәтерлибез, бүгенге көндә Сарман командасы өчен көрәшә. Иң җиңел үлчәүдә көрәшеп, Ижауда Алмазга лидер буларак та чыгыш ясарга туры килгән.

Татарстан командасы бәйгедә ышанычлы рәвештә беренче урынны яулаган. Безнекеләр тугыз үлчәү авырлыгында бер категориядә генә икенче урында калган. Көмеш медаль яулаган Чаллы егете Айнур Мирзаянов та беренче әйләнештә үк мәйдан хуҗасына оттырган. Очрашу башланып, ике алым белән исәпне 4:0 ясаса да, Удмуртия вәкиле ахыр чиктә җиңгән. Дөрес, монда хөкемдарлар кулы да үз эшен эшләгән, бугай.

Калган егетләребез - Алмаз Миннехуҗин, Сабадан Рамил Тимербаев, Кукмарадан Илфат Тимергалиев, Арчадан Илсаф Фазылҗанов, Түбән Камадан Тимерхан Әмирханов, Кукмарадан Рамазан Мөхәммәтҗанов, Кама Тамагыннан Алмаз Гыйләҗев, Казаннан Айрат Фатхуллин беренче урында калган.

Кызык, әлеге ярышларда Башкортстан командасы бөтенләй килеп тә тормаган икән. Шул ук вакытта, Равил Хәйруллин сөйләгәнчә, Дагыстан көрәшчеләре сокландырган. Алар Ижауда самбо буенча ярышларда да катнашып, сигез алтын медаль яулаган була. Көрәш бәйгесенә дә кереп, командалар беренчелегендә өченче урынны отканнар. Икенче урында - Удмуртия көрәшчеләре.

Шунысын да искәртик: бәйге - мастерлык турниры булып санала. Димәк. якын араларда Татарстанның тагын берничә көрәшчесе Россиянең спорт остасы исеменә лаек булырга мөмкин.

Ә без исә барлык көрәшчеләрне, тренерларны, көрәш җанатарларын Физкультурачылар көне белән котлыйбыз! Сау-сәламәт булыгыз, уңышлар юлдаш булсын!