Хоккейга «аппетит» ачылды

Көнбатыш һәм Көнчыгыш конференцияләр финалы вакытында уеннар белән кызыксынып китүемне үзем дә сизми калдым. Монда бу этапка килеп җиткән дүртлекнең роле зур булгандыр дип уйлыйм. КХЛ лидерларының берсе - Магнитогорск «Металлург»ы, озак еллар дәвамында тотрыклы уйнаучы команда буларак, хоккей сөючеләрнең мәхәббәтен инде күптән яулаган иде. Шуңа да «Металлург»ның ут күршеләребез һәм принципиаль көндәшебез булган «Салават Юлаев» белән сериясе аерым кызыксыну уятты. Ә Ярославль «Локомотив»ы белән Праганың «Лев» командасы уены тагын да ныграк сокландырды. Авиа­һәлакәткә эләккән команда урынында бер елдан соң яңадан тергезелгән «Локомотив»ның, «Динамо» (Мәскәү), СКА (Санкт-Петербург) кебек грандларны юлыннан алып атып, Көнбатыш конференция финалына җитүе зур батырлык булды. Бөтен куәтен баштагы этапларга сарыф иткән команданың «Лев»ка каршы торырга гына көче җитеп бетмәде. «Лев»ның үзенә килгәндә, аның лиганың төп финалына барып җитүе Россия хоккей сөючеләре өчен сөенечле сюрприз булгандыр. КХЛда икенче генә сезонын уздыручы Прага командасы быелгы финалның төп бизәге булды дисәк тә, ялгышмабыз. Моңарчы Гагарин Кубогы өчен көрәшнең хәлиткеч этабына бер генә чит ил командасының да эләгә алганы юк иде бит.
Кем белә, бәлки әлеге көчле Европа командасы финалга чыкмаган булса, лига рекорды да тиз генә яңармаган булыр иде. Магнитогорск-Прага хоккейчылары катнашындагы финал матчлары КХЛның алты еллык тарихында иң нәтиҗәлесе булды. Командалар 7 уенда икесенә бергә 44 алка кертте. Моңа кадәр КХЛ рекордын, 2010 елгы финалда 33 алка кертеп, «Ак Барс» белән МВД хоккей клубы куйган иде.
Прагада узган матчлар 17 меңнән артык тамашачы белән шыгрым тулган трибуналар, аларда үрнәк булырлык җан ату культурасы, чех артистларының Россия гимнын җырлавы белән дә истә калачак. Тагын бер кызыклы момент: «Металлург»ны бу сезонда җитәкләгән 64 яшьлек Канада белгече Майк Кинэн КХЛда Гагарин Кубогын откан беренче чит ил тренеры булды. «Тимер Майк» тәхәллүсен йөрткән бу легендар шәхеснең моннан егерме ел элек НХЛда Стэнли Кубогын яулавын беләбез.
Быелгы финал сериясе чын мәгънәсендә хоккей бәйрәме бүләк итүе белән дә күңелгә кереп калды. Ул көчләрнең тигез булуы, интриганың ахыргы уенның соңгы минутларына кадәр саклануы белән дә аерылып торды. Җиңүчене ачыклар өчен максималь 7 уен уздырырга туры килсә дә, бу мавыктыргыч финал матчлары җитми дә калды әле.
«Металлург» - «Лев» уен­нары шәхсән үземә элекке «барс»лар каршылыгы белән дә кызык­лы булды. Металл коючылар составында, белгәнебезчә, «Ак Барс» белән инде ике тапкыр Гагарин Кубогын яулаган Данис Зарипов һәм Дмитрий Казионов, Прага клубында, Данис белән бер звенода уйнап, Казан клубының җиңүләренә өлеш керткән Нико Капанен белән аның ватандашы, безнең элекке капкачы Петри Веханен уйный. «Металлург»ның хәлиткеч уенда җиңүе Данис белән Дмитрийга үз карьераларындагы өченче Гагарин Кубогын яуларга ярдәм итте.
Уңышсызлык булмаса, Зариповка бу бәхет елмаер идеме икән?! Озак еллар Казан клубы лидерларының берсе булган Данис Зариповның «Ак Барс»та торгынлык кичерә башлавы беркемгә дә сер түгел иде бит. Узган сезон тәмамлангач, бездән китеп, ул отты гына. Хоккейчының туган төбәгендә «икенче сулышы» ачылды. «Металлург»та Мозякин-Зарипов тандемы бүген инде Россия хоккееның брендына әйләнде. Сезонның иң яхшы уенчысы булып танылган Сергей Мозякин финалдан соң юкка гына, Данис өчен Казанга рәхмәт, димәгәндер.
Күпсанлы тамашачыларга өметне өзмәскә булышканнары, хоккейга «аппетитны» ачканнары өчен, егетләрнең үзләренә рәхмәт әйтәсе килә. Әле хоккей сезоны тәмамланмады бит, иртәгә Беларусьта дөнья беренчелеге башлана...