XXVII Бөтендөнья җәйге Универсиадага төп-төгәл бер ай калып бара. Kazan-Arena стадионында беренче репетиция дә узган. Әйтүләренчә, декоратив конструкцияләр монтажы инде ахыргы этапта. Конструкциянең авырлыгы - 467 тонна, биеклеге 50 метрдан да артып китә. Ә менә ачылыш тантанасы нинди булачагы һәм анда кемнәр катнашачагы сер булып кала бирә.
Тантананың генераль продюсеры Россиянең халык артисты, композитор Игорь Крутой, режиссер-куючысы - спорт уеннары ачылышы тантаналары авторы Алексей Сеченов. Баш балетмейстер Бакуда узган нәфис гимнастика буенча Европа чемпионаты ачылышын оештыруда катнашкан Жанна Шмакова.
Репетицияләрдә күбесенчә Казан коллективлары җәлеп ителгән. Репетицияләр графигы да бик тыгыз. Алар көн саен уздырыла башлаячак. Ачылыш тантанасында Казанның 70 иҗат коллективы катнашачак. Тамашада исә барлыгы 1,5 мең кеше катнашыр дип көтелә.
Универсиада ябылу тантанасына чакырылган эстрада йолдызлары исемлеге дә билгеле. Ябылу тантанасы башлыча яшь буынга адресланган дияргә була. Чөнки анда Земфира, «Мумий Тролль», Елка, «Би-2», «Серебро» чыгыш ясаячак. Шушы көннәрдә шоуда катнашачагын тагын Гарик Сукачев, Сергей Лазарев, Тимур Родригес, Нюша раслаган. Анда «Голос» проекты җиңүчеләре Динә Гарипова һәм Эльмира Кәлимуллинаны да ишетеп булачак.
Универсиада уеннарына билетлар сатылу көткәннән дә уңышлырак булган. Башка елларда уздырылган уеннар белән чагыштырганда, ачылыш тантанасына билетлар бик тиз сатылып беткән. Синхрон йөзү, волейбол, баскетбол, җиңел атлетика, нәфис гимнастика кебек спорт төрләренә дә кызыксыну зур икән. Шушы көннәрдә аларга да билетлар сатылып бетәр кебек.
