Казан шәһәренең көрәш федерациясенә яңа җитәкче билгеләнде

Бүген Татарстанның спорт министрлыгында Казан шәһәрендә көрәш торышы мәсьәләләренә багышланган киңәшмә узды. Киңәшмәне спорт министрының беренче урынбасары Хәлил Шәйхетдинов үткәрде. Күптән түгел, Муса Җәлил турниры алдыннан үткән Татарстан Көрәш федерациясе Президиумы утырышында да нәкъ менә Хәлил Хәмит улы Казанда көрәшне үстерүгә яңача якын килү кирәклеген искәрткән иде. Казанда уза торган Сабан туйларын бөтенләй башкача үткәрә башларга кирәк диде Атказанган спорт остасы. Әйтик, үзәк Сабантуйга көрәшчеләрне дә чакырабыз кебек, әмма аларны анда кертмиләр дигән фикер яңгырады. “Татарстан Рәисенә, дәрәҗәле кунакларга, бәйрәмне олылап килгән һәр тамашачыга иң көчле көрәшчеләребезне, көрәшебезнең бөтен матурлыгын күрсәтергә кирәк безгә!”, дип белдерде Шәйхетдинов.

Татарстан Көрәш федерациясе башкарма директоры Марсель Таһиров та кызыклы чагыштыру уздырды. "Балтачта район беренчелегендә 120дән артык көрәшче катнашса, Казан чемпионатында нибары 56 көрәшче бил алышкан", дигәнрәк сүзләре чыннан да уйга салган иде ул чакта. Ә бит кайчан гына әле УНИКС спортзалларында уза торган башкала чемпионатына шәһәр мэры үзе, аның артыннан район башлыклары килеп, Татарстан беренчелекләреннән дә югарырак дәрәҗәдә үтә иде ул.

Бүгенге утырышта болар һәм башкалар хакында фикер алышканнан соң, Казан шәһәре көрәш федерациясенең яңа җитәкчесе итеп танылган көрәшче, спорт остасы, танылган эшмәкәр һәм меценат Расих Габдрахманов сайланды. Казанда көрәш тә, көрәшчеләр дә бар - монысын һич кенә дә инкарь итеп булмый. Шул ук Расих әфәнде генә дә соңгы елда Казанда ничә көрәш түгәрәге ачты, танылган көрәшчеләрне тренерлык эшенә тартты, көрәш буенча "Зилант" клубы оештырып җибәрде һәм бу клуб кыска гына вакыт эчендә югары нәтиҗәләргә дә иреште. Казанның Мәскәү, Авиатөзелеш, Яңа Савин районнарында оста җитәкчеләр, тренер кулы астында көрәш түгәрәкләре алып барыла. Хәзер булганны югалтмыйча, булмаганны булдырып эшлисе генә кала. Уңышлар телибез!